Live Updates

×یہ ظلم پوری انسانیت کے ماتھے پر ایک بدنما داغ ہے، جس پر عالمی برادری کی خاموشی مجرمانہ ہے،جمعیت علمائے اسلام بلوچستان

ہفتہ 22 مارچ 2025 22:45

# کوئٹہ (اُردو پوائنٹ اخبارتازہ ترین - آن لائن۔ 22 مارچ2025ء)جمیعت علما اسلام بلوچستان کے صوبائی امیر، سینیٹر مولانا عبدالواسع نے اسرائیل کی جانب سے فلسطین میں جاری ظلم و ستم کی شدید الفاظ میں مذمت کرتے ہوئے کہا ہے کہ صیہونی ریاست نے انسانی حقوق اور عالمی قوانین کی کھلم کھلا خلاف ورزی کرتے ہوئے نہتے فلسطینی عوام پر قیامت برپا کر دی ہے۔ اسرائیلی فوج کی مسلسل وحشیانہ بمباری کے نتیجے میں معصوم بچے، خواتین اور بوڑھے شہید ہو رہے ہیں، جبکہ غزہ اور مغربی کنارے میں زندگی مفلوج ہو چکی ہے۔

انہوں نے کہا کہ یہ ظلم پوری انسانیت کے ماتھے پر ایک بدنما داغ ہے، جس پر عالمی برادری کی خاموشی مجرمانہ ہے۔مولانا عبدالواسع نے کہا کہ امتِ مسلمہ کو اب محض مذمتی بیانات اور رسمی قراردادوں سے آگے بڑھ کر عملی اقدامات کرنے ہوں گے۔

(جاری ہے)

اگر آج مسلم دنیا متحد نہ ہوئی تو تاریخ ہمیں کبھی معاف نہیں کرے گی۔ مسلم حکمرانوں کی بے حسی اور خاموشی نے اسرائیل کو مزید جری کر دیا ہے، جو مسلسل فلسطینی سرزمین پر قبضہ کر کے وہاں کے عوام کو بے دخل کر رہا ہے۔

یہ وقت ہے کہ اسلامی ممالک مشترکہ حکمت عملی اپنائیں اور فلسطینی عوام کے لیے ہر ممکن سفارتی، سیاسی، اور معاشی اقدامات کریں۔انہوں نے حکومتِ پاکستان پر زور دیا کہ وہ اسرائیل کے خلاف مثر سفارتی اقدامات کرے اور عالمی فورمز پر فلسطینی عوام کا مقدمہ بھرپور انداز میں لڑے۔ مزید برآں، پاکستانی حکومت کو اسلامی تعاون تنظیم (OIC) اور اقوامِ متحدہ میں فعال کردار ادا کرتے ہوئے اسرائیل پر دبا بڑھانا چاہیے تاکہ وہ مظلوم فلسطینی عوام پر جاری ظلم و بربریت کو بند کرے۔

مولانا عبدالواسع نے پاکستانی عوام سے اپیل کرتے ہوئے کہا کہ وہ اپنے فلسطینی بھائیوں کی حمایت میں ہر ممکن کوشش کریں، سوشل میڈیا، جلسوں، مظاہروں اور دیگر ذرائع سے اپنی آواز بلند کریں تاکہ عالمی ضمیر کو جھنجھوڑا جا سکے۔ انہوں نے کہا کہ فلسطین صرف عربوں کا نہیں، بلکہ پوری امت مسلمہ کا مسئلہ ہے، اور ہر مسلمان پر لازم ہے کہ وہ اپنے فلسطینی بھائیوں کے ساتھ کھڑا ہو۔