وزیرخارجہ کا صادق خان کی افغان فریق سے بات چیت پر اطمینان کا اظہار’ دوطرفہ تعلقات کو مزید مستحکم کرنے کیلئے ہدایات جاری

پیر 24 مارچ 2025 23:09

اسلام آباد (اُردو پوائنٹ اخبارتازہ ترین - آن لائن۔ 24 مارچ2025ء)وزیرخارجہ محمد اسحاق ڈار نے خصوصی نمائندے محمد صادق خان کی افغان فریق کے ساتھ ہونے والی بات چیت پر اطمینان کا اظہارکرتے ہوئے دوطرفہ تعلقات کو مزید مستحکم کرنے کے لیے ہدایات جاری کی ہیں۔ دفترخارجہ کے ترجمان کے مطابق افغانستان کا دورہ کرنے والے پاکستان کے نمائندہ خصوصی برائے افغانستان صادق خان نے دورہ افغانستان کے بعد وزیرخارجہ اسحاق ڈار سے ملاقات کی اور انہیں افغانستان کے دورے کی تفصیلات سے آگاہ کیا۔

وزیر خارجہ اسحاق نے دورہ پر اطمینان کا اظہار کرتے ہوئے دو طرفہ تعلقات کو مضبوط بنانے پر زور دیا۔ترجمان کے مطابق وزیر خارجہ کی ہدایت پر محمد صادق خان تین روزہ دورہ کابل دورہ کیا، صادق خان نے 22 مارچ کو افغانستان کے قائم مقام وزیر خارجہ امیر خان متقی سے ملاقات کی، ملاقات کے دوران فریقین نے باہمی دلچسپی کے تمام امور پر تبادلہ خیال کیا، صادق خان نے ملاقات میں سیکیورٹی سے جڑے مسائل نمٹنے کی اہمیت پر زور دیا، ملاقات میں امن و سلامتی، تجارتی اور اقتصادی تعاون پر بات چیت ہوئی۔

(جاری ہے)

ترجمان کے مطابق صادق خان نے افغانستان کے ساتھ باہمی فائدہ مند تعلقات کے لیے پاکستان کے عزم کا اعادہ کیا، صادق خان نے دو طرفہ تعلقات کو مزید مستحکم کرنے کے لیے تمام تشویش کے مسائل سے نمٹنے پر زور دیا ۔ترجمان دفتر خارجہ کے مطابق دونوں فریقوں نے دوطرفہ تعاون کو مضبوط بنانے کے لیے اعلیٰ سطحی روابط اور بات چیت کو بڑھانے پر اتفاق کیا، فریقین نے دونوں ممالک کے باہمی فائدے کے لیے علاقائی تجارت اور رابطوں کی مکمل صلاحیت کو بروئے کار لانے پر اتفاق کیا، نمائندہ خصوصی نے وزیر خارجہ کو افغان قیادت کے ساتھ اپنی ملاقاتوں کے بارے میں آگاہ کیا، اسحاق ڈار نے افغان فریق کے ساتھ ہونے والی بات چیت پر اطمینان کا اظہار کیا،اسحاق ڈار نے دوطرفہ تعلقات کو مزید مستحکم کرنے کے لیے ہدایات جاری کیں۔