ماحولیاتی قوانین کی خلاف ورزی پر سخت کارروائی، غیر قانونی بھٹے اور پلاسٹک بیگز کے خلاف کریک ڈاؤن جاری

لاہور (اُردو پوائنٹ اخبارتازہ ترین - این این آئی۔ 25 مارچ2025ء)وزیراعلیٰ پنجاب مریم نواز شریف کے ماحولیاتی وژن کے تحت صوبے بھر میں ماحولیاتی آلودگی کے خلاف سخت اقدامات کیے جا رہے ہیں۔ اس حوالے سے محکمہ ماحولیات (ای پی ای) نے غیر قانونی بھٹوں، پلاسٹک بیگز اور آلودگی پھیلانے والے صنعتی یونٹس کے خلاف بھرپور کریک ڈاؤن کا آغاز کر دیا ہے۔ای پی اے کی کارروائیوں میں پنجاب کے مختلف شہروں میں 24 غیر قانونی نان زگ زیگ بھٹے گرائے جا چکے ہیں، جن میں بھکر اور راولپنڈی میں 2، سرگودھا میں 3، بہاولپور میں 4 اور لودھراں میں 13 بھٹے شامل ہیں۔

حکام کے مطابق زگ زیگ ٹیکنالوجی نہ اپنانے والے مزید بھٹوں کے خلاف بھی کارروائی جاری رہے گی۔پنجاب میں غیر قانونی پلاسٹک بیگز کے خلاف بھی کریک ڈاؤن تیز کر دیا گیا ہے۔

(جاری ہے)

اس مہم کے دوران صوبے بھر میں 3,057 دکانوں، مارکیٹوں اور شاپنگ سینٹرز کا معائنہ کیا گیا، جبکہ غیر قانونی پلاسٹک بیگز فروخت کرنے پر 195 کاروباری مراکز کو نوٹس جاری کیے گئے۔

ماحولیاتی تحفظ کے تحت 16.1 ٹن غیر قانونی پلاسٹک بیگز ضبط کر لیے گئے، جبکہ پلاسٹک آلودگی کے خلاف 17 مقدمات درج کیے گئے اور 1.4 لاکھ روپے کے جرمانے بھی عائد کیے گئے۔ حکام نے واضح کیا ہے کہ پلاسٹک بیگز کے مکمل خاتمے تک مہم جاری رہے گی۔ صنعتی آلودگی پر قابو پانے کے لیے ای پی اے نے 388 صنعتی یونٹس کا تفصیلی معائنہ مکمل کر لیا ہے، جس کے دوران ماحولیاتی قوانین کی خلاف ورزی پر 10 یونٹس کو وارننگ نوٹس جاری کیے گئے، جبکہ 6 صنعتی یونٹسظجن میں اسٹیل ری رولنگ، گارمنٹس اور ٹیکسٹائل فیکٹریاں شامل ہیںظکو سیل کر دیا گیا ہے۔

پنجاب میں پانی کے بہتر استعمال کو یقینی بنانے کے لیے بھی اقدامات کیے جا رہے ہیں۔ 29 سروس اسٹیشنز پر ویسٹ واٹر ری سائیکلنگ سسٹم نصب کیا جا چکا ہے، جبکہ پانی کے ضیاع کو روکنے کے لیے 479 سروس اسٹیشنز کو نوٹس جاری کیے گئے اور 22 سروس اسٹیشنز سیل کر دیے گئے جبکہ عالمی یوم جنگلات کے موقع پر پنجاب بھر میں شجرکاری مہم کے تحت 56,003 درخت لگائے گئے۔

حکومت کی جانب سے مزید شہروں میں بھی شجرکاری مہم شروع کرنے کا اعلان کیا گیا ہے، جبکہ جنگلات کی کٹائی کی روک تھام کے لیے سخت قوانین متعارف کرانے کا عندیہ بھی دیا گیا ہے۔سینئر صوبائی وزیر مریم اورنگزیب کا کہنا ہے کہ ماحولیاتی قوانین کی خلاف ورزی پر کسی قسم کی رعایت نہیں برتی جائے گی۔ صنعتی آلودگی، غیرقانونی بھٹوں اور پلاسٹک بیگز کے خاتمے کے لیے سخت ایکشن جاری رہے گا، جبکہ حکومت ماحولیاتی بہتری کے لیے تمام ممکنہ وسائل بروئے کار لا رہی ہے۔ ''درخت لگائیں، ماحول بچائیں'' کے پیغام کے ساتھ عوام کو بھی شجرکاری مہم میں بھرپور شرکت کی دعوت دی گئی ہے تاکہ ماحولیاتی بہتری میں ہر فرد اپنا کردار ادا کر سکے۔