اڈیالہ جیل،بابر اعوان کو بانی پی ٹی آئی، بشریٰ بی بی سے ملاقات کی اجازت ملنے پر تنازع

بدھ 26 مارچ 2025 01:45

راولپنڈی (اُردو پوائنٹ اخبارتازہ ترین - این این آئی۔ 26 مارچ2025ء)بانی پی ٹی آئی اور بشریٰ بی بی سے بابر اعوان کو ملاقات کی اجازت ملنے پر اڈیالہ جیل گیٹ نمبر 5 پر تنازع کھڑا ہوگیا۔اڈیالہ جیل عملے سے مکالمہ کرتے ہوئے سلمان اکرم راجہ نے بتایا کہ آپ ڈسپلن قائم کریں، بابر اعوان کا نام ہماری لسٹ میں شامل نہیں۔انہوں نے اعتراض اٹھایا کہ آپ بابر اعوان کو اندر کیوں لائی ان کی گاڑی بھی جیل گیٹ سے اندر منگوالی گئی، ہم نے جو نام دیے ہیں ان کو ہی ملاقات کے لیے بھیجا جائے۔

سلمان اکرم راجہ نے بتایا کہ بشریٰ بی بی کی جانب سے سلمان صفدر اور عثمان گل کے نام شامل کرلیں۔انہوں نے کہا کہ تمام معاملہ ہائیکورٹ میں طے ہو چکا ہے۔ اعظم سواتی، حامد خان، عزیز بھنڈاری کے نام بھی شامل کریں۔

(جاری ہے)

انہوںنے کہاکہ ہم نے جو 6 نام دیے ان کو ہی ملاقات کی اجازت دیں۔جیل انتظامیہ کی جانب سے بابر اعوان، نیاز اللّٰہ نیازی، سلمان اکرم راجہ کو ملاقات کی اجازت مل گئی جبکہ انکے علاوہ ظہیر عباس چوہدری، نعیم حیدر پنجوتھا، سلمان صفدر کو بھی ملاقات کی اجازت مل گئی۔

جیل عملے نے موقف اپنایا کہ ہم نے تمام رہنماؤں کے نام بجھوا دیے تھے، جن کو اجازت ملی ان کے ناموں سے آگاہ کردیا۔اس پر سلمان اکرم راجہ نے کہا کہ آپ بابر اعوان کا نام لسٹ سے نکالیں، وہ نام ہم نے نہیں دیا، اگر آپ بابر اعوان کو بھیجیں گے تو میں اسی جگہ احتجاج کروں گا۔پی ٹی آئی رہنما نے کہا کہ آپ بابر اعوان کو روکیں گے تو ہم ملاقات کیلیے جائیں گے۔ اس پر جیل عملے نے کہا کہ ہم بابر اعوان کو روکتے ہیں آپ جاکر ملاقات کرلیں۔جیل کے باہر صحافی نے سوال کیا کہ آپ نے بابر اعوان کا نام نہیں دیا کیسے ملاقات کی اجازت مل گئی جس پر سلمان اکرم راجہ کا کہنا تھا کہ جی ہم نے ان کا نام نہیں دیا، ہم اس پر احتجاج کریں گے، ہم ڈسپلن قائم کروائیں گے۔