وزیر داخلہ سے امریکی سفیر کی ملاقات، جعفر ایکسپریس پر حملے سمیت دہشت گردی کی مذمت

پاک امریکا تعلقات، باہمی دلچسپی کے امور سمیت دو طرفہ تعاون بڑھانے پر تبادلہ خیال

جمعرات 27 مارچ 2025 18:05

وزیر داخلہ سے امریکی سفیر کی ملاقات، جعفر ایکسپریس پر حملے سمیت دہشت ..

اسلام آباد (اُردو پوائنٹ اخبارتازہ ترین - این این آئی۔ 27 مارچ2025ء)وفاقی وزیر داخلہ محسن نقوی سے امریکا کی قائم مقام سفیر نیٹلی بیکر نے ملاقات کرکے جعفر ایکسپریس پر حملے اور دہشت گردی کے دیگر واقعات کی مذمت کی ہے،ملاقات میں میں پاک امریکا تعلقات، باہمی دلچسپی کے امور سمیت دو طرفہ تعاون بڑھانے پر تبادلہ خیال کیا گیا۔قائم مقام امریکی سفیر نیٹلی بیکر نے دہشت گرد حملوں میں شہید افراد کے خاندانوں سے اظہار تعزیت کرتے ہوئے کہا کہ پاکستان میں دہشت گردی کے حالیہ واقعات میں جاں بحق افراد کے خاندانوں سے دلی ہمدردی ہے۔

ملاقات میں دہشت گردی کے خلاف باہمی اشتراک کار بڑھانے کے حوالے سے بھی بات چیت کی گئی جبکہ رواں سال جون میں کاونٹر ٹیررازم ڈائیلاگ کرانے پر اتفاق کیا گیا۔

(جاری ہے)

اس موقع پر وزیر مملکت برائے داخلہ طلال چوہدری، امریکا کے پولیٹیکل قونصلر زیک ہارکن رائیڈر اور وفاقی سیکریٹری داخلہ خرم آغا بھی موجود تھے۔قائم مقام امریکی سفیر نیٹلی بیکر نے طلال چودھری کو وزیر مملکت داخلہ کا منصب سنبھالنے پر مبارکباد دی۔

اس موقع پر وزیر داخلہ محسن نقوی نے کہاکہ دہشت گردی ایک بین الاقوامی مسئلہ ہے، اس سے نمٹنے کے لیے عالمی براداری کو مل کر کام کرنا ہوگا، حکومت پاکستان دہشت گردوں کے خلاف بھرپور کارروائی کر رہی ہے۔انہوں نے کہاکہ دہشت گردی کے خلاف جنگ کے ضمن میں ہمہ جہتی پالیسی تیار کی جا رہی ہے۔محسن نقوی نے دہشت گردی کے خلاف جنگ میں پاکستان کی کاوشوں کو سراہنے پر امریکی صدر ڈونلڈ ٹرمپ کا شکریہ اداکیا جبکہ قائم مقام امریکی سفیر نے اسلام آباد میں جاری ترقیاتی منصوبوں کی تعریف کی۔

وزیر داخلہ نے کہا کہ امریکا میں غیر قانونی طور پر مقیم پاکستانیوں کی ملک واپسی میں ہر ممکن تعاون کریں گے، پاک امریکا کاکس کا اجلاس 30 اپریل کو نیو یارک میں منعقد کیا جائے گا۔اس موقع پر وزیر مملکت برائے داخلہ طلال چوہدری نے کہا کہ دہشتگردی کے خلاف جنگ میں پاکستان نے لازوال قربانیاں دی ہیں، امریکا کے اسٹریٹجک پارنٹر ہیں۔