عید الفطر پر پنجاب میں قیدیوں کی 3ماہ کی سزا معاف کرنے کا اعلان

صدرمملکت کی جانب سے سزائوں میں کمی کے اعلان پر سب سے زیادہ قیدی اڈیالہ جیل سے رہا ہوں گے

محمد علی جمعہ 28 مارچ 2025 18:08

لاہور (اُردو پوائنٹ اخبارتازہ ترین۔ 28 مارچ2025ء)عید الفطر پر پنجاب میں قیدیوں کی 3ماہ کی سزا معاف کرنے کا اعلان۔ تفصیلات کے مطابق صدر مملکت آصف علی زرداری کی جانب سے عید الفطر کی آمد پر پنجاب کے جیلوں میں قید افراد کی سزاوں میں کمی کرنے کا اعلان کیا گیا ہے۔ پنجاب کی جیلوں میں قید افراد کیلئے صدر پاکستان اصف علی زرداری نے قیدیوں کی 3ماہ کی سزائیں معاف کرنے کا اعلان کیا ہے۔

جیل حکام کے مطابق صدر مملکت کی جانب سے سزائوں میں کمی کے اعلان کے بعد پنجاب کی جیلوں میں بند 1606قیدیوں کی سزاوں میں کمی ہوئی ہے۔ معمولی جرائم میں ملوث قیدیوں کی سزاوں میں 3ماہ کی معافی ہوئی ہے۔ بتایا گیا ہے کہ پنجاب کے جیلوں میں راولپنڈی کے اڈیالہ جیل میں قید افراد کو سب سے زیادہ ریلیف ملے گا۔

(جاری ہے)

حکام کے مطابق اڈیالہ جیل راولپنڈی میں سب سے زیادہ 105قیدیوں کو رہائی ملے گی۔

صدر کی معافی کا اطلاق دہشت گردی، قتل، اغوا اور دیگر سنگین جرائم کے ملزموں پر نہیں ہوگا۔ سندھ حکومت نے بھی عیدالفطر پر قیدیوں کی سزاوں میں خصوصی معافی کا نوٹیفکیشن جاری کر دیا۔ حکومت سندھ نے سزا یافتہ قیدیوں کو 120 دن کی خصوصی معافی دے دی ، سزاوں میں کمی کا محکمہ داخلہ سندھ نے حکم نامہ جاری کر دیا ، سزائے موت کے مجرم،ریاست مخالف سرگرمیوں کے مجرمان پر معافی لاگو نہیں ہو گی۔ نوٹیفکیشن میں کہا گیاہے کہ خصوصی معافی سے سندھ کے مختلف جیلوں میں 820 قیدی مستفید ہوں گے۔