Live Updates

پی ٹی آئی کے ووٹوں سے منتخب رکن قومی اسمبلی چوہدری عثمان مسلم لیگ ن میں شامل

قرآن پاک پر تحریک انصاف اور عمران خان سے وفاداری کا حلف دے کر ساہیوال سے ایم این اے بننے والے رکن نے وزیراعظم شہباز شریف سے ملاقات میں حکومت کی پالیسیوں پر اعتماد کا اظہار کردیا

ساجد علی پیر 30 جون 2025 16:04

پی ٹی آئی کے ووٹوں سے منتخب رکن قومی اسمبلی چوہدری عثمان مسلم لیگ ن ..

اسلام آباد ( اُردو پوائنٹ اخبارتازہ ترین۔ 30 جون2025ء ) پاکستان تحریک انصاف کے ووٹوں سے منتخب رکن قومی اسمبلی چوہدری عثمان مسلم لیگ ن میں شامل ہوگئے۔ تفصیلات کے مطابق وزیراعظم محمد شہباز شریف سے ساہیوال سے تعلق رکھنے والے بطور تحریک انصاف کے حمایت یافتہ آزاد منتخب ہونے والے رکن قومی اسمبلی چوہدری عثمان علی نے ملاقات کی، قرآن پاک پر وفاداری کا حلف دے کر عام انتخابات میں ساہیوال سے ایم این اے بننے والے رکن نے وزیراعظم شہباز شریف سے ملاقات میں حکومت کی پالیسیوں پر اعتماد کا اظہار کردیا۔

بتایا گیا ہے کہ اس موقع پر وزیراعظم نے چوہدری عثمان علی کو پاکستان مسلم لیگ ن میں شمولیت اختیار کرنے پر مبارکباد دی اور نیک خواہشات کا اظہار کیا جب کہ رکن قومی اسمبلی چوہدری عثمان علی نے حکومتی پالیسیوں پر اعتماد کا اظہار کرتے ہوئے آئندہ سال کے بجٹ کی قومی اسمبلی سے منظوری پر وزیراعظم کو مبارکباد پیش کی، اس کے علاوہ وزیراعظم سے ملاقات میں انہوں نے اپنے متعلقہ انتخابی حلقے کے امور پر بھی گفتگو کی، اس ملاقات میں وزیر اعظم کے مشیر رانا ثنا اللہ بھی شریک تھے۔

(جاری ہے)

علاوہ ازیں وزیراعظم شہباز شریف نے ناراض پارٹی رہنماء چوہدری نثار علی خان سے ملاقات کی اور انہیں مسلم لیگ ن میں واپسی کی دعوت دیدی، اس مقصد کے لیے وزیراعظم مسلم لیگ ن کے سابق رہنما اور وفاقی وزیر چوہدری نثار سے ملاقات کے لیے ان کی رہائش گاہ پہنچے، اس موقع پر شہباز شریف نے چوہدری نثار کی عیادت کی اور دونوں رہنماؤں کے درمیان سیاسی امور پر بھی تبادلہ خیال ہوا۔

ذرائع کا کہنا ہے کہ ملاقات میں چوہدری نثار کے صاحبزادے تیمور علی خان بھی موجود تھے، چوہدری نثار علی خان سے وزیر اعظم کی ملاقات ڈیڑھ گھنٹہ جاری رہی، ملاقات میں وزیر اعظم نے شکوہ کرتے ہوئے کہا کہ ’چوہدری صاحب آپ تو ہمیں بھول ہی گئے‘، اس پر چوہدری نثار نے جواب دیا کہ ’نہیں میاں صاحب، بس طبیعت ٹھیک نہیں رہتی‘، اسی دوران شہباز شریف نے چوہدری نثار علی خان کو مسلم لیگ ن میں دوبارہ شمولیت کی دعوت دی اور کہا کہ ’اب آپ اپنے گھر واپس آجائیں‘، جس پر چوہدری نثار نے وزیراعظم سے کچھ وقت مانگ لیا۔