پاکستان کا وہ علاقہ جہاں کل عید الفطر منائے جائے گی

کراچی (اُردو پوائنٹ اخبارتازہ ترین۔ 29 مارچ2025ء) پاکستان کا وہ علاقہ جہاں کل عید الفطر منائے جائے گی، پاکستان میں عید کے چاند کی رویت سے متعلق بھی پیشن گوئی کر دی گئی۔ ۔ تفصیلات کے مطابق کل بروز اتوار کو سعودی عرب کے ساتھ ساتھ پاکستان کے مخصوص علاقوں میں بھی عید الفطر منائے جائے گی۔ داؤدی بوہرہ جماعت کل اتوار کو ملک بھر عید الفطر کے اجتماعات کا انعقاد کرے گی۔

داؤدی بوہرہ جماعت کل اتوار کو ملک بھر بھی عید الفطر مذہبی جوش و جذبے سے منائے گی ۔ نماز عید کے اجتماعات میں ملک و قوم کی بقا سالمیت، امن وامان ، دہشت گردی کے خاتمے سمیت ترقی و خوشحالی کے لیے خصوصی دعائیں مانگی جائیں گی۔ کراچی میں عید الفطر کا سب سے بڑا اجتماع صدر کی طاہری مسجد میں منعقد ہوگا۔

(جاری ہے)

اس کے علاوہ پان منڈی، سولجر بازار، بلوچ کالونی، نارتھ ناظم آباد اور حیدری میں بھی نماز عید کے اجتماعات منعقد ہوں گے۔

دوسری جانب سعودی عرب سمیت 6 اسلامی اور مجموعی طور پر 9 ممالک میں آج 29 رمضان المبارک کو شوال کا چاند نظر آنے کا اعلان کر دیا گیا۔ گلف نیوز کے مطابق سعودی عرب شوال 1446 ہجری کے چاند کی رویت کا اعلان کرنے والا دنیا کا پہلا ملک بن گیا، جس کے بعد متحدہ عرب امارات، قطر، بحرین، کویت، ترکیہ، امریکا، برطانیہ اور فرانس میں بھی شوال کا چاند نظر آ گیا۔

سعودی عرب، متحدہ عرب امارات، قطر، بحرین، کویت، ترکیہ، امریکا، برطانیہ اور فرانس میں کل بروز اتوار 30 مارچ کو عید الفطر کے اجتماعات ہوں گے، عید الفطر بھرپور مذہبی جوش و خروش سے منائی جائے گی۔ جبکہ عمان خلیجی کونسل کا واحد ملک ہے جہاں آج چاند نظر نہیں آیا، عمان میں رمضان المبارک کا 30 روزوں کے بعد اختتام ہو گا، سلطنت میں عید الفطر 31 مارچ بروز پیر کو منائی جائے گی۔

اس سے قبل 5 اسلامی ممالک سمیت 7 ممالک میں عید الفطر 31 مارچ کو ہونے کا اعلان کیا جا چکا۔ برونائی دارالاسلام دنیا کا پہلا اسلامی ملک ہے جہاں سب سے پہلے عید الفطر 1446 ہجری کی تاریخ کا باضابطہ اعلان کیا گیا۔ برونائی دارالاسلام میں 31 مارچ بروز پیر کو عید الفطر منائی جائے گی۔ برونائی دارالاسلام کے بعد ملائیشیا، انڈونیشیا، بنگلہ دیش، بھارت اور ایران نے بھی عید الفطر 31 مارچ بروز پیر کو ہونے کا اعلان کر دیا۔

اس سے قبل سب سے پہلے آسٹریلیا میں عید الفطر کی تاریخ کا باضابطہ اعلان کیا گیا۔ آسٹریلیا میں مفتی اعظم اور فتوٰی کونسل کی جانب سے مشترکہ طور پر ماہ مبارک کے اختتام سے متعلق آسٹریلیا میں رہائش پذیر مسلمانوں کو آگاہ کر دیا گیا۔ آسٹریلیا دنیا کا پہلا ملک ہے جہاں رواں سال کی عید الفطر کی تاریخ کا باضابطہ اعلان کیا گیا۔ آسٹریلین فتوٰی کونسل کی جانب سے جاری اعلامیہ کے مطابق آسٹریلیا میں عید الفطر 31 مارچ بروز پیز کو منائی جائے گی۔

دوسری جانب سپارکو کے سائنسی تجزیے کے مطابق شوال کا نیا چاند آج بروز ہفتہ 29 مارچ 2025 کو پاکستان کے معیاری وقت کے مطابق 15:58 بجے (3 بج کر 58 منٹ پر) پیدا ہو چکا۔ محکمہ موسمیات کے ترجمان کے مطابق 30 مارچ اور29 رمضان کورویت ہلال کمیٹی کااجلاس ہوگا۔ اجلاس کے وقت چاند کی عمر27 گھنٹے ہوگی، یوں پاکستان میں 30 مارچ کو ماہ شوال کا چاند بآسانی دیکھا جا سکے گا۔ 30 مارچ کو غروب آفتاب اورغروب قمر کے درمیان تقریباً ایک گھنٹے کا فرق ہے، چاند ایک گھنٹے تک دیکھا جا سکے گا۔ ماہ شوال کےچاند کاحتمی اعلان مرکزی رویت ہلال کمیٹی کرے گی۔