عید پر زائد کرایہ لینے والے ٹرانسپورٹرز کیخلاف کریک ڈاؤن، 47 لاکھ 27 ہزار روپے عوام کو واپس کردیئے گئے

اتوار 30 مارچ 2025 14:00

اسلام آباد (اُردو پوائنٹ اخبارتازہ ترین - اے پی پی۔ 30 مارچ2025ء) موٹروے پولیس نے ملک بھر میں عیدالفطر کے موقع پر زائد کرایہ لینے والے ٹرانسپورٹرز کے خلاف کریک ڈاؤن کے دوران زائد کرائے کی مد میں وصول کیے گئے 47 لاکھ 27 ہزار روپے عوام کو واپس کروا دیئے ۔ ترجمان موٹر وے پولیس کی جانب سے اتوار کو جاری بیان کے مطابق یہ کریک ڈاؤن جاری ہے اور اب تک موٹروے پولیس نے زائد کرائے کی مد میں وصول کئے گئے 47 لاکھ 27 ہزار روپے عوام کو واپس کروا دیئے ۔

ترجمان نے کہا کہ اس دوران اوور لوڈنگ پر 2 کروڑ 33 لاکھ 97 ہزار 750 روبے جرمانہ بھی کیا گیا ہے ۔مسافر بردار گاڑیوں میں سفر کرنے والے اوورلوڈنگ اور اوور چارجنگ کی شکایات موٹروے پولیس ہیلپ لائن 130 پر کر سکتے ہیں۔عید کی مناسبت سے بڑھتے ہوئے رش کے پیش نظر موٹروے پولیس کی اضافی نفری بھی تعینات کی گئی ہے۔

(جاری ہے)

تمام ذرائع ابلاغ اور ٹول پلازوں پر روڈ سیفٹی پیغامات کے ذریعے آگاہی مہم بھی۔

جاری ہے ۔ٹول پلازوں پر روڈ سیفٹی پیغامات کے ساتھ ساتھ تحائف بھی تقسیم کیے جا رہے ہیں ۔ذاتی گاڑی استعمال کرنے والے ڈرائیور حضرات چند احتیاطی تدابیر اپناتے ہوئے اپنا سفر محفوظ اور آرام دہ بنائیں۔سفر شروع کرنے سے پہلے گاڑی کا انجن ائل، پانی، ٹائر پریشر اور بریک چیک کر لیں ۔دوران ڈرائیونگ سیٹ بیلٹ کا استعمال، حد رفتار کی پابندی، اگلی گاڑی سے محفوظ فاصلہ اور لین اور لائن کا خیال رکھیں ۔

لمبے سفر سے پہلے ڈرائیور کا مکمل فریش ہونا اور دو سے ڈھائی گھنٹے کی ڈرائیونگ کے بعد کچھ وقت آرام کرنا ضروری ہے ۔ نیند یا غنودگی کی حالت میں ہرگز ڈرائیو نہ کریں۔ کسی بھی مدد کی صورت میں موٹروے پولیس ہیلپ لائن 130 پر رابطہ کیا جا سکتا ہے ۔ترجمان نیشنل ہائی ویز اینڈ موٹروے پولیس نے کہا کہ موٹر وے پولیس اپ کی مدد اور محفوظ سفر کے لیے ہر دم تیار ہے۔