اسرائیل سے قربت، ہنگری کا آئی سی سی سے دستبرداری کا فیصلہ

ہنگری کے وزیراعظم نے آئی سی سی کے فیصلے کو ''بے شرم، خود غرض اور ناقابل قبول'' قرار دیا تھا

جمعہ 4 اپریل 2025 22:35

اسرائیل سے قربت، ہنگری کا آئی سی سی سے دستبرداری کا فیصلہ

بڈاپسٹ (اُردو پوائنٹ اخبارتازہ ترین - آن لائن۔ 04 اپریل2025ء) ہنگری کی حکومت نے عالمی فوجداری عدالت (آئی سی سی) سے دستبردار ہونے کا فیصلہ کیا ہے۔عالمی فوجداری عدالت نے اسرائیلی وزیر اعظم کی گرفتاری کا وارنٹ جاری کر رکھا ہے اور یہ اعلان ایسے وقت میں سامنے آیا جب نیتن یاہو سرکاری دورے پر ہنگری پہنچے ہیں۔ہنگری کے دائیں بازو کے وزیر اعظم وکٹر اوربان نے نومبر میں نیتن یاہو کو اس وقت دورے کی دعوت دی تھی جب ایک روز قبل آئی سی سی نے غزہ میں جنگی جرائم پر ان کا وارنٹ جاری کیا تھا۔

ہنگری عالمی فوجداری عدالت کا بانی رکن ہونے کے باوجود کسی بھی وارنٹ پر عمل درآمد کرنے سے انکاری ہے۔ ہنگری کے وزیراعظم نے آئی سی سی کے فیصلے کو ''بے شرم، خود غرض اور ناقابل قبول'' قرار دیا تھا۔

(جاری ہے)

ہنگری نے 1999 میں آئی سی سی کے معاہدے پر دستخط کیے اور 2001 میں اس کی توثیق کی، مگر اسے ملکی قانون کا حصہ نہیں بنایا گیا۔ہنگری کی حکومت کے چیف آف اسٹاف گرجیلی گولیاس نے اعلان کیا کہ دستبرداری کا باضابطہ عمل شروع کیا جا رہا ہے، جو ایک سال میں مکمل ہوگا۔

ہالینڈ جہاں آئی سی سی کا ہیڈکوارٹر ہے، نے کہا کہ اس دوران ہنگری کو اپنی ذمہ داریاں پوری کرنا ہوں گی۔یاد رہے کہ نیتن یاہو کو ہنگری کے وزیراعظم اوربان کی مسلسل حمایت حاصل رہی ہے اور انہوں نے اسرائیل کے خلاف یورپی یونین کے اقدامات کو کئی بار روکا ہے۔آئی سی سی کے مطابق نیتن یاہو اور ان کے سابق وزیر دفاع پر غزہ میں شہریوں کے خلاف حملے، قتل اور قحط کو بطور ہتھیار استعمال کرنے کے الزامات ہیں۔غزہ میں اسرائیل کے بدترین حملوں کے نتیجے میں 50,000 سے زائد فلسطینی شہید ہو چکے ہیں۔