گنڈاپور حکومت نے کرپشن کے سابق ریکارڈ بھی توڑ ڈالے، علی امین بتائیں اب اینٹ انہیں ماری جائے یا بانی پی ٹی آئی کو ،اختیار ولی

بانی پی ٹی آئی اسٹیبلشمنٹ سے بات کرنے کیلئے منتیں کر رہے ہیں، فوج کرپشن میں لتھڑی قیادت کیساتھ بیٹھ کر اپنا دامن داغدار نہیں کریگی، بیان

ہفتہ 5 اپریل 2025 20:35

پشاور (اُردو پوائنٹ اخبارتازہ ترین - این این آئی۔ 05 اپریل2025ء)مسلم لیگ (ن) کے مرکزی رہنما و وزیراعظم کے کوآرڈی نیٹر اختیار ولی خان نے کہا ہے کہ علی امین گنڈاپور کی حکومت نے کرپشن کے سابق ریکارڈ بھی توڑ ڈالے ہیں۔وزیراعلی خیبرپختونخوا علی امین گنڈاپور کے بیان پر ردعمل دیتے ہوئے اختیار ولی خان نے کہا کہ تحریک انصاف کی حکومتیں پاکستان کی تاریخ کی کرپٹ ترین حکومتیں ثابت ہوئیں، گنڈاپور حکومت نے کرپشن کے سابق ریکارڈ بھی توڑ ڈالے، علی امین بتائیں اب اینٹ انہیں ماری جائے یا بانی پی ٹی آئی کو ۔

انہوں نے کہا کہ تحریک انصاف جنرل باجوہ اور بیک ڈور ساشوں کے ذریعے حکومت میں آئی تھی، بانی پی ٹی آئی آج بھی کسی چور دروازے کی تلاش میں اسٹیبلشمنٹ سے بات کرنے کیلئے منتیں کر رہا ہے۔

(جاری ہے)

اختیارولی نے کہا کہ فوج کرپشن میں لتھڑی تحریک انصاف قیادت کیساتھ بیٹھ کر اپنا دامن داغدار نہیں کرے گی، تحریک انصاف 8 حصوں میں تقسیم ہوچکی ہے، بانی پی ٹی آئی بھی کنٹرول کھو چکے۔انہوں نے کہا کہ بجلی کی قیمتوں میں کمی سے پورا پاکستان خوش جبکہ پی ٹی آئی والوں کو مرگی کے دورے پڑ رہے ہیں، وزیراعظم شہبازشریف کی قیادت میں ملک کی ترقی کی سمت بڑھنا شروع ہو چکا ہے۔اختیار ولی نے کہا کہ اب وزیراعظم شہباز شریف ہر ماہ قوم کو ایک سے بڑھ کر ایک نئی خوشخبری دیا کرینگے۔