Live Updates

امریکا میں ٹرمپ انتظامیہ کیخلاف احتجاجی مظاہرے

مظاہرین کاامیگریشن پالیسیوں، تجارتی محصولات، تعلیمی بجٹ میں کٹوتیوں ،وفاقی ملازمتوں میں 20ہزار سے زائد کٹوتیوں پر غم و غصے کا اظہار امریکا میں جمہوریت کی بحالی، عوامی مفادات کی حفاظت کرنے کیلئے طاقتور افراد کیخلاف متحد ہو کر کھڑے ہوئے ہیں، مظاہرین

اتوار 6 اپریل 2025 17:35

واشنگٹن (اُردو پوائنٹ اخبارتازہ ترین - این این آئی۔ 06 اپریل2025ء)امریکا میں صدر ڈونلڈ ٹرمپ کی متنازع پالیسیوں کے خلاف ہزاروں لوگ سڑکوں پر نکل آئے۔ غیر ملکی میڈیا کے مطابق ڈونلڈ ٹرمپ کی پالیسیوں کے خلاف مظاہرین نے واشنگٹن، نیویارک، ہیوسٹن، فلوریڈا، کولوراڈو اور لاس اینجلس سمیت دیگر مقامات پر احتجاجی ریلیاں نکالیں۔

(جاری ہے)

رپورٹ میں بتایا گیا ہے کہ امریکا کے 1ہزار سے زائد شہروں میںہینڈز آف کے عنوان سے نکالی گئی ان احتجاجی ریلیوں میں شامل مظاہرین نے امیگریشن پالیسیوں، تجارتی محصولات، تعلیمی بجٹ میں کٹوتیوں اور ایلون مسک کی سربراہی میں محکمہ حکومتی کارکردگی کی جانب سے وفاقی ملازمتوں میں کی گئی 20 ہزار سے زائد کٹوتیوں پر شدید غم و غصے کا اظہار کیا۔

رپورٹ کے مطابق واشنگٹن میں ڈونلڈ ٹرمپ کی پالیسیوں کے خلاف احتجاج میں 20 ہزار سے زائد مظاہرین نے شرکت کی۔رپورٹ کے مطابق امریکہ کے علاوہ کینیڈا، میکسیکو اور کئی یورپی ممالک میں بھی ڈونلڈ ٹرمپ کی پالیسیوں کے خلاف احتجاج کیے گئے۔احتجاج میں شامل مظاہرین نے کہا کہ وہ امریکا میں جمہوریت کی بحالی، عوامی مفادات کی حفاظت کرنے کے لیے طاقتور افراد کے خلاف متحد ہو کر کھڑے ہوئے ہیں۔مظاہرین نے مطالبہ کیا کہ حکومت فوری طور پر ان عوام دشمن پالیسیوں کو واپس لے۔