پائیلٹس کے جعلی لائسنس سے متعلق ایف آئی اے، سول ایوی ایشن کی درخواست مسترد

پیر 7 اپریل 2025 18:10

کراچی (اُردو پوائنٹ اخبارتازہ ترین - این این آئی۔ 07 اپریل2025ء)سندھ ہائیکورٹ نے پائیلٹس کے جعلی لائسنس سے متعلق سول ایوی ایشن اور ایف آئی اے کی اپیل مسترد کردی۔سندھ ہائیکورٹ میں پائیلٹس کے جعلی لائسنس سے متعلق سول ایوی ایشن اور ایف آئی اے کی اپیل کی سماعت ہوئی۔ درخواست گزار کے وکلا جمیل احمد اور عامرمنصوب ایڈووکیٹس نے موقف دیا کہ سینیٹ میں پیش ہونے والی رپورٹ میں پائیلٹس پر الزامات کو جھوٹ قرار دیا گیا ہے۔

(جاری ہے)

رپورٹ میں وفاقی وزیر ہوا بازی غلام سرور خان کے الزامات کو جھوٹا قرار دیا گیا ہے۔ رپورٹ میں کہا گیا کہ وفاقی وزیر کے الزامات سے ملک پی آئی اے اور پائیلٹس کی بدنامی ہوئی ہے۔غلام سرور خان کے بیان سے پی آئی اے کو پوری دنیا میں پابندی کا سامنا کرنا پڑا۔عدالت نے سول ایوی ایشن اور ایف آئی اے کی اپیل مسترد کردی۔ سول ایوی ایشن اور ایف آئی اے نے وفاقی اینٹی کرپشن کورٹ کے فیصلے کیخلاف اپیل دائر کی تھی۔ اینٹی کرپشن کورٹ نے 68 پائیلٹس کا کیس ختم کردیا تھا۔ سول ایوی ایشن نے وفاقی وزیر ہوا بازی کے بیان کے بعد 68 پائیلٹس کیخلاف مقدمہ درج کرایا تھا۔