Live Updates

امریکی فنڈز کی کٹوتی لاکھوں لوگوں کے لیے سزائے موت ہو سکتی ہے، ورلڈ فوڈ پروگرام

منگل 8 اپریل 2025 11:00

روم (اُردو پوائنٹ اخبارتازہ ترین - اے پی پی۔ 08 اپریل2025ء) اقوام متحدہ متحدہ کے ذیلی ادارے ورلڈ فوڈ پروگرام (ڈبلیو ایف پی) نے کہا ہے کہ امریکا نے 14 ممالک کے لئے ہنگامی خوراک کی امداد بند کر دی ہے جس سے بھوک سے دوچار لاکھوں لوگوں کی زندگیوں کو خطرات لاحق ہو گئے ہیں۔ اردو نیوز کے مطابق ورلڈ فوڈ پروگرام، جس کو رواں برس پہلے سے ہی فنڈز میں 40 فیصد کمی کا سامنا ہے، کا کہنا ہے کہ اس کو حکام کی جانب سے بتایا گیا ہے کہ امریکا کی جانب سے14 ممالک کے لئے دی جانے والی ہنگامی غذائی امداد بند کر دی گئی ہے۔

ادارے نے ایکس اکاؤنٹ پر پوسٹ میں ان ممالک کے نام نہیں بتائے تاہم ادارے نے کہا کہ اگر اس پر عملدرآمد ہوا تو ان لاکھوں لوگوں کے لئےسزائے موت ہو سکتی ہے جو شدید بھوک اور افلاس کا سامنا کر رہے ہیں۔

(جاری ہے)

ورلڈ فوڈ پروگرام اقوام متحدہ کا وہ واحد ادارہ نہیں ہے جو امریکی فنڈز میں کٹوتیوں کی وجہ سے متاثر ہوا ہے کیونکہ ڈونلڈ ٹرمپ کے صدر بننے کے بعد امریکا نے دوسرے ممالک کی امداد بند کرنے کا سلسلہ شروع کیا ہے۔

اقوام متحدہ کے ادارے پاپولیشن فنڈ نے گزشتہ روز بتایا کہ اس کو ٹرمپ انتظامیہ کی جانب سے اطلاع دی گئی ہے کہ2 پروگرام بند کئے جا رہے ہیں ۔ پاپولیشن فنڈ جنسی اور تولیدی صحت کے فروغ کے لئے کام کرتا ہے۔ ان میں سے ایک پروگرام افغانستان جبکہ دوسرا شام کے لئے تھا۔ امریکا کے علاوہ بھی دیگر ممالک نے حالیہ مہینوں کے دوران فنڈز میں کمی کے اعلانات کئے ہیں، جس کے بعد این جی اوز اور بین الاقوامی تنظیموں میں تشویش کی لہر دوڑ گئی ہے۔

امریکی صدر ڈونلڈ ٹرمپ کی انتظامیہ نے امریکا کے سب سے بڑے انسانی امداد کے ادارے یو ایس ایڈ کو بھی بڑے پیمانے پر متاثر کیا ہے اور پہلے اس کا سالانہ بجٹ 42 ارب 80 کروڑ ڈالر تھا جو کہ عالمی سطح پر امدادی کاموں کے لئےتقسیم ہونے والی امدادی رقم کا 42 فیصد بنتا تھا۔