326 واں وساکھی میلہ،یاتریوں کی حفاظت اور آرام دہ قیام کیلئے خصوصی انتظامات کئے جائیں، رمیش سنگھ اروڑہ

لاہور (اُردو پوائنٹ اخبارتازہ ترین - اے پی پی۔ 08 اپریل2025ء) صوبائی وزیر اقلیتی امور رمیش سنگھ اروڑہ کی زیر صدارت محکمہ داخلہ میں اعلی سطحی اجلاس منگل کے روز یہاں منعقد ہوا،اجلاس میں وساکھی میلہ کے انتظامات کا تفصیلی جائزہ لیا گیا۔سیکرٹری داخلہ پنجاب نور الامین مینگل نے خصوصی شرکت کی ۔ایڈیشنل سیکرٹری شرائنز سیف اللہ کھوکھر نے وساکھی میلہ بارے بریفنگ دیتے ہو ئے کہا کہ326 واں وساکھی میلہ 10 سے 19 اپریل تک جاری رہے گا،میلے میں 20 ہزار مقامی یاتری، 3 ہزار ڈائس پورا اور بھارت و دنیا بھر سے 7 ہزار یاتری شرکت کریں گے جبکہ کرتا رپور میں 16 اپریل کو مذہبی رسومات کے ساتھ کبڈی میچ کا بھی اہتمام کیا جائے گا۔

اس موقع پرصوبائی وزیر اقلیتی امور رمیش سنگھ اروڑہ نے کہا کہ وزیراعلی پنجاب نے گزشتہ برس یاتریوں کے لیے راستے کھولنے پر زور دیا تھا،سات ہزار یاتریوں کی بڑی تعداد کا آنا اسی سلسلے کی کڑی ہے۔

(جاری ہے)

صوبائی وزیر اقلیتی امور نے سیکرٹری داخلہ پنجاب کی ہدایت کر تے ہو ئے کہا کہیاتریوں کی حفاظت اور آرام دہ قیام کے لیے خصوصی انتظامات کیے جائیں،لیسکو حکام فیسٹیول کے دوران بجلی کی بلا تعطل فراہمی یقینی بنائیں، یاتریوں کے لیے ائیر کنڈیشنڈ مارکیوں کا انتظام کیا جائے،حسن ابدال اور ننکانہ صاحب میں وسیع انتظام کیلئے مستقل کا ماسٹر پلان بنایا جائے۔

انہوں نے کہا کہ دنیا بھر سے آنے والے یاتریوں کیلئے بہتر انتظامات پاکستان کی توقیر کیلئے اہم ہیں، سینئر سٹیزن کاونٹرز، اضافی باتھ رومز، ہیوی ویٹ جنریٹرز، اور ایف آئی اے کے مزید کاونٹرز کا انتظام کیا جائے۔ صوبائی وزیر نے کرنسی ایکسچینج کے لیے معیاری ڈیلرز کا انتخاب کرنے کی بھی ہدایت کی اور کہا کہ یاتریوں کی سہولت کے لیے بینک آف پنجاب کے کائونٹر لگوائے جائیں۔

صوبائی وزیر نے سیکرٹری انسانی حقوق کو ہدایت کی کہ بہترین کوارڈینیشن کے لیے محکمہ اقلیتی امور سے ایک فوکل پرسن نامزد کیا جائے،اٹک میں یاتریوں کے لیے بہتر رہائشی انتظامات کو یقینی بنانے کی بھی ہدایت کی گئی۔ رمیش سنگھ اروڑہ نے کہاکہایک برس میں ٹور ازم کے حوالے سے پنجاب میں 72 فیصداضافہ ہوا ہے،وزیراعلی پنجاب نے مذہبی اقلیتوں کے تمام تہواروں میں شرکت کرکے ایک تاریخ رقم کی ہے، امید ہے کہ وزیراعلی پنجاب خصوصی طور پر وساکھی میلہ میں شرکت کریں گی۔

رمیش سنگھ اروڑہ نے کہا کہ سب کو مل کر ایک بہترین ٹیم ورک کے نتیجے میں پاکستان کا مثبت پہلو اجاگر کرنا ہے۔ ٹرانسپورٹ کا فٹنس سرٹیفکیٹ لازمی قرار دیا جائے، وسیع لنگر کا انتظام، میڈیکل سہولتیں اور ایمبولینسز کا انتظام یقینی بنایا جائے۔اجلاس میں سیکرٹری متروکہ وقف املاک بورڈ ، ایڈیشنل سیکرٹری شرائنز،سیکرٹری انسانی حقوق، پاک رینجرز، اعلی پولیس حکام اور قانون نافذ کرنیوالے اداروں کے نمائندگان کی شرکت کی۔مختلف اضلاع کے ڈی سیز اور ڈی پی اوز کی بذریعہ ویڈیو لنک شرکت کی۔اجلاس میں محکمہ صحت، ٹرانسپورٹ، ریسکیو1122, پولیس اور دیگر نمائندگان بھی شریک ہوئے۔