Live Updates

محکمہ جنگلات نے رواں مالی سال 2024-25 میں ابتک 4.1 ملین درخت لگا کر اہم سنگ میل عبور کر لیا

بدھ 9 اپریل 2025 18:23

لاہور (اُردو پوائنٹ اخبارتازہ ترین - این این آئی۔ 09 اپریل2025ء)وزیراعلیٰ پنجاب مریم نواز شریف کی زیر نگرانی تین میگا منصوبوں پر تیزی سے کام جاری ہے، جن میں ’’وزیراعلیٰ پلانٹ فار پاکستان انیشیٹو‘‘، ’’چیف منسٹرز انیشیٹو فار ایگرو فاریسٹری آن فاریسٹ ویسٹ لینڈ‘‘، اور ’’گرین پاکستان پروگرام‘‘شامل ہیں۔ ان منصوبوں کا مقصد ماحولیاتی بہتری، انسداد سموگ اور روزگار کے مواقع پیدا کرنا ہے۔

محکمہ جنگلات نے رواں مالی سال 2024-25 میں اب تک 4.1 ملین درخت لگا کر اہم سنگ میل عبور کر لیا ہے، اور اب ہدف سے آگے نکلنے کے لیے جامع حکمت عملی تیار کر لی گئی ہے۔وزیراعلیٰ مریم نواز شریف نے شجرکاری کو صرف درخت لگانے کا عمل نہیں بلکہ آئندہ نسلوں کے تحفظ کا مشن قرار دیا ہے۔

(جاری ہے)

ان منصوبوں کے تحت آئندہ پانچ سالوں میں 57,551 ایکڑ رقبے پر 47 ملین درخت لگانے کا ہدف مقرر کیا گیا ہے۔

محکمہ جنگلات نے غیر ترقیاتی بجٹ کے تحت 0.3 ملین درخت لگائے، جبکہ دیگر اداروں اور افواج پاکستان کو 7 ملین پودے فراہم کیے گئے۔سینئر صوبائی وزیر مریم اورنگزیب نے کہا کہ یہ منصوبے ماحولیاتی آلودگی کے خلاف اہم ہتھیار ہیں، اور ان سے نہ صرف قدرتی ماحول بہتر ہوگا بلکہ روزگار اور معیشت کو بھی فروغ ملے گا۔بنجر زمینوں پر شجرکاری کے ذریعے ماحول دوست زونز قائم کیے جا رہے ہیں جو موسمیاتی تبدیلی سے نمٹنے کا مؤثر حل ثابت ہوں گے۔

مریم نواز کی ہدایت کے مطابق ’’ہر شہری ایک پودا لگائے ‘‘کیونکہ سبز پنجاب ہم سب کی اجتماعی ذمہ داری ہے۔ان منصوبوں کی بدولت نہ صرف درخت لگ رہے ہیں بلکہ ایک نئی ماحول دوست معیشت کی بنیاد بھی رکھی جا رہی ہے جو دور دراز علاقوں کی ترقی میں اہم کردار ادا کر رہی ہے۔