محکمہ خوراک کے گوداموں میں گندم چوری،خوردبرد میں ملوث 3افراد گرفتار ،دیگرکی گرفتاری کیلئے چھاپے جاری

کوئٹہ(اُردو پوائنٹ اخبارتازہ ترین - این این آئی۔ 09 اپریل2025ء) اینٹی کرپشن اسٹیبلشمنٹ بلوچستان نے محکمہ خوراک کوئٹہ اورژوب میں گندم چوری ،خوردبرد اور مالی بے ضابطگی میں ملوث 3افراد کوگرفتار کرلیا جبکہ دیگر ملوث افسران کی گرفتاری کیلئے مختلف مقامات پر چھاپے مارے جارہی ہیں۔اینٹی کرپشن اسٹیبلشمنٹ بلوچستان کے ترجمان کے مطابق اسسٹنٹ کمشنر سٹی عبداللہ اورا سسٹنٹ کمشنر صدر حمزہ انجم نے شکایت درج کرائی تھی کہ مختلف ٹرکوں میں گندم کی بوریاں بغیر کسی قانونی دستاویزات کے مختلف فلورملز اوراضلاع کو منتقل کی جارہی ہیں ابتدائی تحقیقات سے یہ بات سامنے آئی کہ گندم کی یہ بوریاں محکمہ خوراک کے اسپنی روڈ اور وائٹ روڈ گوداموں سے لوڈ کی گئی تھیںجبکہ ٹرک ڈرائیورز سے قانونی چالان اور دستاویزات طلب کی گئیں تو وہ کوئی ثبوت پیش نہ کرسکے اسکے بعد متعلقہ افسران کو طلب کیا گیا لیکن وہ بھی کوئی وضاحت یا قانونی دستاویز فراہم نہ کرسکے گودام کے ریکارڈ کی جانچ پڑتال کے دوران انکشاف ہواکہ گندم کی بوریاں بغیر اندراج کے نکالی گئیں اور اسٹاک رجسٹرمیں موجود مقدار اصل گنتی سی مختلف تھی ریکارڈ کے مطابق 31929بوریاں درج تھیں جبکہ اصل میں 43975بوریاں موجود تھیں جوکہ کرپشن اور خوردبرد کی واضح علامت ہے۔

(جاری ہے)

ترجمان نے کہا کہ تحقیقات میں یہ سامنے آیا کہ اسلم شاہ نے خوردبرد کو چھپانے کیلئے ایک سبسڈائزڈ ریٹ پر محکمہ خوراک کے اکاؤنٹ میں رقم فلور ملز کے نام پر اگلے روز جمع کرائی تاکہ بدعنوانی کو قانونی شکل دی جاسکے اس اقدام پر پاکستان فلور ملز ایسوسی ایشن نے بھی اعتراضات کئے ہیں۔ترجمان نے کہا کہ ابتک کی تحقیقات کے مطابق گندم کی 2018بوریاں چوری کی گئیں جس سے حکومت کو تقریباً2کروڑ30لاکھ روپے کا نقصان پہنچااور 5افراد سلمان کاکڑ،اسلم شاہ، اللہ الدین ، عبدالمتین ،سلیم چوری اور خوردبرد میں ملوث پائے گئے ۔

ترجمان نے کہا کہ اینٹی کرپشن نے تین ملزمان انچارج سپنی روڈ گودام عبدالمتین ،انچارج سپنی روڈ گودام اللہ الدین اوراسسٹنٹ ڈائریکٹر ،انچارج وائٹ روڈگودام اسلم شاہ کوگرفتارکرلیا ہے جبکہ موث افسران ڈائریکٹر ایدمن ،ڈپٹی ڈائریکٹر کوئٹہ زون سلیمان کاکڑ،سپروائزر وائٹ روڈ گودام سلیم کی گرفتاری کیلئے چھاپے مارے جارہے ہیں ۔ترجمان نے کہا کہ محکمہ خوراک ژوب میں بڑے کرپشن اسکینڈل پرکارروائی کرتے ہوئے محمد اعظم اورظفراچکزئی کے خلاف مقدمہ درج کرلیا گیا ہے یہ دونوں افراد محکمہ خوراک ژوب کے گوداموں میں گندم کی بڑی مقدار میں کمی اور ریکارڈ میں ہیرپھیر میںملوث ہیں جن کی گرفتاری کیلئے چھاپے مارے جارہے ہیں ۔