Live Updates

عمران خان سے فیملی اور پارٹی رہنماﺅں کی ملاقات کروانے کیلئے پی ٹی آئی نے فہرست جیل حکام کوبھجوا دی

سلمان اکرم راجہ کی جانب سے بانی پی ٹی آئی سے ملاقات کیلئے جن افراد کی فہرست بھجوائی گئی ہیں ان میں عمران خان کی بہنوں ،شبلی فراز،عمر ایوب ،صاحبزادہ حامد رضا،احمد خان بھچر ،نیاز اللہ نیازی اور علامہ راجہ ناصر عباس کے نام شامل ہیں

فیصل علوی جمعرات 10 اپریل 2025 11:25

راولپنڈی(اردوپوائنٹ اخبار تازہ ترین۔10اپریل 2025)بانی پی ٹی آئی عمران خان سے فیملی اور پارٹی رہنماﺅں کی ملاقات کروانے کیلئے پی ٹی آئی نے فہرست جیل حکام کو بھجوا دی،سیکریٹری جنرل پی ٹی آئی سلمان اکرم راجہ نے ناموں کی فہرستیں جیل حکام کو بھیجی ہیں،سلمان اکرم راجہ کی جانب سے بانی پی ٹی آئی سے ملاقات کیلئے جن افراد کی فہرست بھجوائی گئی ہیں ان میں عمران خان کی بہنوں ان کے کزن ،شبلی فراز،عمر ایوب ،صاحبزادہ حامد رضا،احمد خان بھچر ،نیاز اللہ نیازی اور علامہ راجہ ناصر عباس کے نام شامل ہیں۔

ترجمان بانی پی ٹی آئی نیاز اللہ نیازی کا کہنا ہے کہ اڈیالہ جیل حکام سے آج رہنماو¿ں کے ساتھ فیملی کی ملاقات کی درخواست کی ہے۔انہوں نے کہا کہ منگل کو بانی پی ٹی آئی کی فیملی کی ملاقات نہیں کروائی گئی تھی۔

(جاری ہے)

واضح رہے کہ دو روز قبل بھی اڈیالہ جیل حکام نے بانی پی ٹی آئی کی بہنوں علیمہ خان،عظمیٰ خا ن سمیت پی ٹی آئی کے چیئرمین بیرسٹرگوہر،پی ٹی آئی کے سیکرٹری جنرل سلمان اکرم اور ظہیر عباس چوہدری کو بانی پی ٹی آئی عمران خان سے ملاقات کرنے سے روک دیاتھا۔

چیئرمین پی ٹی آئی بیرسٹر گوہر، سلمان اکرم راجہ اور ظہیر عباس چودھری کی گاڑی کو جیل سے کچھ دور پہلے لگے ناکے پر روک دیا گیاتھا بعدازاں ان تینوں کو پیدل بھی جیل جانے نہیں دیا گیاتھا۔جیل کے باہر میڈیا سے گفتگو کرتے ہوئے علیمہ خان کا کہنا تھا کہ ہم پریشان تھیں۔ ہمیں اپنے بھائی عمران خان سے3 ہفتے سے ملاقات کرنے نہیں دی جا رہی تھی۔آج بھی جیل کے باہرپولیس تعینات کر دی گئی تھی تاکہ ہم ملاقات نہ کر سکیں۔

ان کا یہ بھی کہنا تھا کہ ایسی صورتِ حال میں ہم پریشان نہیں ہوں گے تو کیا ہوں گے؟ اگر ملاقات نہیں کرنے دیں گے تو ہم یہیں بیٹھیں گے۔ایس ایچ او صدر بیرونی اعزاز عظیم نے ان کو گھر جانے کی پیشکش کی تھی تاہم علیمہ خانم بضد رہیں اور کہتی رہیں کہ ہماری بھائی سے ملاقات کروائی جائے نہیں تو ادھر ہی رہیں گے۔قبل ازیں پی ٹی آئی نے بانی پی ٹی آئی سے اڈیالہ جیل میں ملاقات نہ کروانے کے خلاف اسلام آباد ہائیکورٹ سے رجوع کیا گیا تھاجس پر عدالت عالیہ نے عمران خان اور ان کی اہلیہ بشریٰ بی بی سے پارٹی رہنماوں اور فیملی کی ملاقات کیلئے منگل اور جمعرات کا دن مقرر کیا تھا۔