بانی پی ٹی آئی این آر او کیلئے بھیک مانگ رہے ہیں ، قوم کا مفاد مسلم لیگ ن کے ساتھ ہے،عظمی بخاری

لاہور (اُردو پوائنٹ اخبارتازہ ترین - اے پی پی۔ 12 اپریل2025ء) وزیر اطلاعات پنجاب عظمی بخاری نے کہا ہے کہ بانی پی ٹی آئی پہلے دن سے این آر او کے لئے بھیک مانگ رہے ہیں لیکن کوئی انہیں سننے کو تیار نہیں، قوم کا مفاد مسلم لیگ (ن) کے ساتھ ہے جو عوام کے مسائل حل کرنے اور سرمایہ کاری کے فروغ کے لئے عملی اقدامات کر رہی ہے۔ لاہور پریس کلب ہائوسنگ سکیم کے ایف بلاک میں بجلی کی تنصیب کا افتتاح کرنے کے موقع پرمیڈیا سے گفتگو کرتے ہوئے عظمی بخاری نے کہا کہ صحافی کالونی فیز ٹو وزیر اعلی پنجاب مریم نواز کے "اپنی چھت اپنا گھر" پروگرام کا تسلسل ہے، کالونی میں 36 کروڑ روپے کی لاگت سے پانی، بجلی اور دیگر بنیادی سہولیات فراہم کی جائیں گی، پریس کلب میں سولر بیک اپ کو بڑھایا جائے گا جبکہ کینٹین، انشورنس اور سبسڈی اسکیموں کو بھی مزید بہتر بنایا جائے گا۔

(جاری ہے)

انہوں نے کہا کہ وہ خود کو صحافی برادری کا حصہ سمجھتی ہیں اور صحافیوں کی فلاح و بہبود کے لیے ہر ممکن اقدام کریں گی، صحافی کالونی کو اسٹیٹ آف دی آرٹ بنانے کے لیے روڈا منصوبے کے تحت کام جاری اور چھتیس کروڑ روپے کی لاگت سے پانی، بجلی سمیت دیگر بنیادی سہولیات فراہم کی جائیں گی۔وزیر اطلاعات نے کہا کہ حکومت صحافیوں کو زمین خود الاٹ کرے گی اور انہیں صرف تعمیراتی چارجز ادا کرنے ہوں گے، ایف بلاک کے دیرینہ مسائل حل کرنے کے عزم کا اظہار کرتے ہوئے عظمی بخاری نے کہا کہ اب مسائل کو مستقل بنیادوں پر حل کیا جائے گا۔

انہوں نے مزید کہا کہ نو مئی کے واقعات قوم کے مفاد میں نہیں تھے ، مسلم لیگ (ن) ہی ملک میں سرمایہ کاری اور پسے ہوئے طبقات کے مسائل کے حل کے لیے عملی اقدامات کر رہی ہے۔عظمی بخاری نے کہا کہ وزیراعلی پنجاب کی حکومت میں اب چھوٹے ملازمین کو قربانی کا بکرا نہیں بنایا جاتا بلکہ ذمہ داری اوپر سے طے کی جاتی ہے، پتنگ بازی اور کتے کے کاٹنے جیسے واقعات کی بھی کڑی نگرانی کی جا رہی ہے۔

انہوں نے واضح کیا کہ بلوچستان پاکستان کا حصہ ہے، اس حوالے سے اندرونی و بیرونی سازشوں کو ہمیشہ کی طرح ناکام بنایا جائے گا،جو سیاستدان دہشت گردوں کی پشت پناہی کرے وہ سیاستدان کہلانے کا حق دار نہیں۔مزید برآں عظمی بخاری نے یہ بھی اعلان کیا کہ گندم کی نقل و حمل پر اب کوئی پابندی نہیں، مریم نواز کی قیادت میں کسانوں کا تحفظ یقینی بنایا جائے گا تاکہ روٹی کی قیمت میں اضافہ نہ ہو۔

اس موقع پرسیکرٹری اطلاعات پنجاب سید طاہر ہمدانی نے کہا کہ صحافی کالونی کا خواب اب حقیقت میں بدل رہا ہے،صحافی برادری کے ساتھ حکومت کا مضبوط رشتہ اور باہمی تعاون سے ترقیاتی منصوبے مکمل کیے جا رہے ہیں۔صدر لاہور پریس کلب ارشد انصاری نے کہا کہ صحافی برادری چاہتی ہے کہ فیز ٹو کا افتتاح مریم نواز خود کریں۔ انہوں نے حکومت پنجاب کا صحافیوں کی فلاح و بہبود کے اقدامات پر شکریہ ادا کیا۔