پاکستان کرپٹو کونسل کے ایڈوائزر کا منی لانڈرنگ میں سزا یافتہ ہونے کا انکشاف

لاہور (اُردو پوائنٹ اخبارتازہ ترین۔ 14 اپریل2025ء) پاکستان کرپٹو کونسل کا ایڈوائزر مقرر کیے جانے والے غیر ملکی شخصیت کا منی لانڈرنگ میں سزا یافتہ ہونے کا انکشاف، چانگ پینگ ژاؤ کی کمپنی کو 4 ارب ڈالرز سے زائد کا جرمانہ بھی ہوا۔ تفصیلات کے مطابق سینئر صحافی و ماہر معیشت شہباز رانا کی جانب سے حال ہی میں پاکستان کرپٹو کونسل کے ایڈوائزر مقرر ہونے والے چانگ پینگ ژاؤ سے متعلق بڑا انکشاف کیا گیا ہے۔

نجی ٹی وی چینل ایکسپریس نیوز سے گفتگو کرتے ہوئے شہباز رانا نے بتایا کہ امریکہ میں منی لانڈرنگ میں سزا یافتہ شخص پاکستان کرپٹو کونسل کا ایڈوائزر مقرر کردیا گیا، یہ بہت حیران کن ڈویلپمنٹ تھی۔ یہ پاکستان میں اسحاق ڈار، انکے بیٹے، نوازشریف اور وزیر خزانہ سے ملے ۔

(جاری ہے)

انہیں نہ صرف منی لانڈرنگ میں سزا ہوئی بلکہ ان کی کمپنی کو 4.3 ارب ڈالر جرمانہ بھی ہوا، ان کی نیٹ ورتھ 66 ارب ڈالرا اور غالباً دنیا کا چوتھا امیر ترین شخص ہے۔

۔ واضح رہے کہ 8 اپریل کو حکومت کی جانب سے اعلان کیا گیا تھا کہ دنیا میں کرپٹو معیشت کے منظرنامہ کو نئی جہت دینے والے ایک تاریخی اقدام میں بائنانس کے بانی اور ویب تھری کے سب سے بااثر رہنماؤں میں شمار ہونے والے چانگ پینگ ژاؤ (سی زیڈ) کو باضابطہ طور پر پاکستان کرپٹو کونسل کا سٹریٹجک مشیر مقرر کر دیا گیا ہے۔ وزارت خزانہ کی جانب سے یہاں جاری بیان کے مطابق یہ اعلان 8 اپریل کو پاکستان کرپٹو کونسل کے ساتھ سی زیڈ کی ملاقات کے دوران کیا گیا۔

وفاقی وزیرِ خزانہ و محصولات سینیٹر محمد اورنگزیب ، چیئرمین سکیورٹیز اینڈ ایکسچینج کمیشن آف پاکستان، گورنر سٹیٹ بینک آف پاکستان اور وفاقی سیکرٹریز برائے قانون و آئی ٹی سمیت اہم سرکاری شخصیات موجود تھیں۔ دورے کے دوران سی زیڈ نے وزیراعظم اور نائب وزیراعظم سے بھی علیحدہ ملاقاتیں کیں۔ وفاقی وزیر خزانہ اور پاکستان کرپٹو کونسل کے چیئرمین سینیٹر محمد اورنگزیب نے بتایاکہ آج پاکستان کے لئے ایک تاریخی لمحہ ہے، ہم دنیا کو واضح پیغام دے رہے ہیں کہ پاکستان جدت کے لئے تیار ہے، سی زیڈ کی شمولیت کے ساتھ ہم ویب تھری، ڈیجیٹل فنانس اور بلاک چین پر مبنی ترقی کے ذریعے پاکستان کو علاقائی طاقت بنانے کے اپنے وژن کو تیز کر رہے ہیں۔

پاکستان کرپٹو کونسل کے سی ای او بلال بن صقیب نے کہا کہ پاکستان مالیاتی دنیا کے مستقبل کے لئے اپنے دروازے کھول رہا ہے اور اس سفر میں ہماری رہنمائی سی زیڈ سے بہتر طریقے سے کرسکتے ہیں، سی زیڈ وہ رہنما ہیں جس نے دنیا کا سب سے بڑا کرپٹو ایکسچینج قائم کیا اور اربوں لوگوں کی مالیاتی آزادی سے متعلق سوچ بدل دی۔ کونسل کے سٹریٹجک مشیر کی حیثیت سے سی زیڈ ضوابط، انفراسٹرکچر، تعلیم اور اپنانے سے متعلق امور پر مشاورت فراہم کریں گے اور حکومت پاکستان و نجی شعبے کے ساتھ مل کر ایک جامع، شفاف اور عالمی معیار کا کرپٹو نظام تشکیل دینے میں کردار ادا کریں گے۔

چانگ پینگ ژاؤ (سی زیڈ) نے بتایاکہ پاکستان 240 ملین سے زائد افراد کا ملک ہے جن میں سے 60 فیصد سے زیادہ کی عمر 30 سال سے کم ہے، یہاں کی صلاحیتیں بے پناہ ہیں۔