Live Updates

عمران خان نے کبھی مذاکرات کے دروازے بند نہیں کیے مذاکرات صرف ملک وقوم کے مفاد میں ہوسکتے ہیں

بانی نے کہا میں اور بشریٰ بی بی عدالتوں میں مقدمات لڑ کر باہر آئیں گے ڈیل کے تحت نہیں، میں نے کسی کو بھی اپنی ذات سے متعلق مذاکرات کرنے کا اختیار نہیں دیا ہے۔ سیکرٹری اطلاعات پی ٹی آئی شیخ وقاص اکرم

ثنااللہ ناگرہ منگل 15 اپریل 2025 20:10

عمران خان نے کبھی مذاکرات کے دروازے بند نہیں کیے مذاکرات صرف ملک وقوم ..

اسلام آباد ( اردوپوائنٹ اخبار تازہ ترین۔ آئی پی اے ۔ 15 اپریل 2025ء ) مرکزی سیکرٹری اطلاعات پی ٹی آئی شیخ وقاص اکرم نے کہا ہے کہ بانی پی ٹی آئی کا کہنا ہے کہ میں نے کبھی مذاکرات کے دروازے بند نہیں کیے مذاکرات صرف ملک وقوم کے مفاد میں ہوسکتے ہیں، میں اور بشریٰ بی بی عدالتوں میں مقدمات لڑ کر باہر آئیں گے ڈیل کے تحت نہیں۔ سیکرٹری اطلاعات پی ٹی آئی شیخ وقاص اکرم نے ایکس پر اپنے بیان میں کہا کہ قائد عمران خان نے اڈیالہ جیل سے آج بتاریخ 15 اپریل کی ملاقات کے بعد پارٹی کو ہدایات جاری کی ہیں۔

ہدایات میں کہا گیا کہ میں نے کبھی بھی مذاکرات کے دروازے بند نہیں کیے لیکن مذاکرات ملک اور قوم کے مفاد اور ملک میں آئین و قانون کی بالادستی کیلئے ہوسکتے ہیں میری ذات سے متعلق نہیں۔

(جاری ہے)

میں اور بشریٰ بی بی قانون کے مطابق اپنے مقدمات عدالتوں سے لڑ کر باہر آئینگے ڈیل کے تحت نہیں۔ میں نے کسی کو بھی اپنی ذات سے متعلق مذاکرات کرنے کا اختیار نہیں دیا ہے۔

بانی نے کہا کہ مائینز اور منرلز بل سے متعلق ہر قسم کے متنازع گفتگو بند ہونی چاہئے، وزیر اعلیٰ علی امین گنڈاپور مجھے بریف کرینگے اسکے بعد میں سیاسی قیادت سے ملاقات کرونگا اور ملاقات کہ بعد میری منظوری سے ہی بل پاس ہوگا، آج کے بعد بل سے متعلق پارٹی کے اندر مزید کوئی اختلافی بیانات نہیں آنے چاہئیں۔ عمران خان نے ہدایت کیہے کہ آپکے مخالفین چاہتے ہیں کہ آپ آپس میں لڑیں اور آپکے اختلافات برقرار رہیں اور اسکا مخالفین فائدہ اٹھائیں، اختلاف یا اختلاف رائے کی باتیں باہر نہیں آنی چاہئیں۔

ایک دوسرے کے خلاف باتوں کو میڈیا یا کسی اور فورم پہ لانے سے سختی سے منع کیا ہے۔ بانی نے کہا کہ پختونخوا اسمبلی میں افغان مہاجرین کے متعلق ایک قرارداد منظور کی جائے جس میں مہاجرین کی ملک بدری کے وقت میں اضافے کا مطالبہ کیا جائے اور وفاقی حکومت پختونخوا کی حکومت کو افغانستان حکومت سے بات کرنے کی اجازت دی جائے کیونکہ دہشتگردی کی وجہ سے ہم بحیثیت صوبہ بہت متاثر ہورہے ہیں۔

پختونخوا اسمبلی سے ایک قراداد منظور کی جائے جس میں چیف جسٹس پشاور ہائیکورٹ سے مطالبہ کیا جائے کہ الیکشن ٹریبونل کے ججز کو ہدایت دی جائے کہ تحریک انصاف کی زیر التوا تمام الیکشن پٹیشنز پہ جلد از جلد فیصلہ کیا جائے۔ بانی نے کہا کہ اتحادیوں سمیت ممکنہ اتحادیوں سے رابطے کا عمل تیزی سے مکمل کر کے اتحاد کو حتمی شکل دی جائے اور مستقبل کے لائحہ عمل کا اعلان کیا جائے، احتجاج سمیت تمام آپشنز ٹیبل پہ موجود ہیں۔