ٓملک دشمن قوتوں اور ریاست کے امن کو خراب کرنے والی قوتوں سے آہنی ہاتھوں سے نمٹنے کا فیصلہ

( مظفرآباد(آن لائن) ٓآزادحکومت ریاست جموں وکشمیر کے سینئر موسٹ وزیر ووزیر داخلہ آزاد کشمیر کرنل(ر) وقار احمد نور نے کہا ہے کہ آزاد کشمیر میں حالیہ دہشتگرد کارروائیوں کے پیچھے افغانستان کی سرزمین سے تحریک طالبان پاکستان اور ’را‘ کا ہاتھ ہونے کے اشارے ملے ہیں۔اس حوالے سے آئندہ دنوں میں حقائق کو قوم کے سامنے رکھیں گے۔ ہم پاکستان سیIsolated نہیں رہ سکتے۔

موجودہ حالات کی سنگینی کا احساس کرتے ہوئے سب کو ذمہ داری کا مظاہرہ کرناہوگا۔خاکی خون میں نہاتی ہے تو ہم چین کی نیند سوتے ہیں۔ انتشار اور بدامنی پھیلانے کی حوصلہ شکنی کی جائے۔ فتنہ خوارج آزادکشمیر پہنچ چکا ہے۔ آزاد کشمیر کے کابینہ اجلاس میں ریاست میں امن وامان کی صورتحال اور ریاست میں بدامنی پیدا کرنے والے واقعات پر غور کیا گیا۔

(جاری ہے)

اجلاس میں ملک دشمن قوتوں اور ریاست کے امن کو خراب کرنے والی قوتوں سے آہنی ہاتھوں سے نمٹنے کا فیصلہ کیا گیا ہے۔ اجلاس میں آزاد کشمیر کی پولیس اور دیگر اداروں کے باہمی تعاون سے دہشتگردی کی کاروائی سے کامیابی سے نمٹنے پر خراج تحسین پیش کیا گیا اور آزاد کشمیر پولیس کے استعداد کار کو بڑھانے کا فیصلہ کیا گیا ہے۔ آزاد کشمیر پولیس کے استعداد کار کو بڑھانے کیلئے کام کررہے ہیں۔

کابینہ اجلاس کو ریاست میں دہشتگردی کے حالیہ واقعات پر بریفنگ دی گئی۔ یہ ملک ہمارا ہے۔ پاک فوج بھی ہماری ہے۔دشمن کی کسی بھی سازش کو ناکام بنایا جائے گا۔ عوامی ایکشن کمیٹی اور دیگر کو کہتے ہیں کہ حکومت کے ساتھ ملکر حالات کی سنگینی کا تدارک کرتے ہوئے ذمہ داری کا ثبوت پیش کریں۔ ان خیالات کا اظہار سینئر موسٹ وزیر آزاد کشمیر کرنل(ر) وقار احمد نور نے آزاد کشمیر کابینہ کی30 ویں اجلاس کے ایجنڈے پروزراء حکومت فیصل ممتازراٹھور، چوہدری رشید، اکبر ابراہیم کے ہمراہ پی آئی ڈی کمپلیکس میں پریس کانفرنس سے خطاب کرتے ہوئے کیا۔

سینئر وزیر نے کہا کہ عوامی مطالبے پر حکومت نے سستی بجلی اور سستاآٹا کی فراہمی کو یقینی بنایا۔ اکتوبر 2024 میں پولیس جوان کی شہادت، ثاقب نامی شخص کی گرفتاری کے بعد انکشافات آزاد کشمیر میں دہشتگردی کی طرف اشارہ کر رہے ہیں۔ اسی تسلسل میں 05 اپریل کو پکڑے جانے والے اسامہ نے بھی ہوشربا انکشافات کئے ہیں۔ آزاد کشمیر میں حالیہ دہشتگرد کارروائیوں کے پیچھے افغانستان کی سرزمین سے تحریک طالبان پاکستان اور را کا ہاتھ ہونے کے اشارے ملے ہیں۔

اس حوالے سے آئندہ دنوں میں حقائق کو قوم کے سامنے رکھیں گے۔ ہم پاکستان سے آئسولیٹڈ نہیں رہ سکتے۔ کشمیری پاک فوج کے ساتھ کھڑے ہیں۔ یہی خاکی وردی خون میں نہاتی ہے تاکہ ہم سکون سے سو سکیں۔ کرنل(ر) وقار احمد نور نے کہا کہ جہاں حکومت کا فرض ہے کہ وہ شہریوں کے جائز مطالبات کو پورا کرے وہی پر ریاست کے امن کیلئے عوام پر بھی حکومت کا ساتھ دینے کی ذمہ داری عائد ہوتی ہے۔

صحافی ریاست کے امن کیلئے شہریوں میں آگاہی پیدا کرنے میں حکومت کے ساتھ تعاون کرے۔ پریس کانفرنس سے خطاب کرتے ہوئے فیصل ممتاز راٹھور نے کہا کہ موجودہ حالات میں ریاست کے تمام سٹیک ہولڈرز کو ایک پیج پر ہونا ضروری ہے۔ آزاد کشمیر کو دہشت گردی کی لہر سے بچانا ہم سب کی ذمہ داری ہے۔ ریاست کے اندر امن و امان کی صورتحال کو بہتر بنانا حکومت سمیت تمام طبقات کی ذمہ داری ہے۔وزیر حکومت چوہدری محمد رشید نے کہاکہ موجودہ صورتحال میں ہر ایک کو اپنا کردارادا کرنے کی ضرورت ہے۔