تحریک انصاف کو کلاس کی طرح نہیں چلایاجا سکتا،عمران خان سلمان اکرم سے ناراض ہوگئے

اسلام آباد(اردوپوائنٹ اخبار تازہ ترین۔16اپریل 2025)پاکستان تحریک انصاف سکول نہیں اسے کلاس کی طرح نہیں چلایا جاسکتا، بانی پی ٹی آئی عمران خان سلمان اکرم راجہ سے ناراض ہوگئے، سینئر صحافی انصار عباسی نے ذرائع کے حوالے سے کہا ہے کہ بانی پی ٹی آئی عمران خان نے اپنے وکیل سلمان صفدر کے توسط سے اپنے تحفظات سلمان اکرم راجہ کو پہنچائے۔ عمران خان نے پی ٹی آئی کے سیکرٹری جنرل سلمان اکرم راجہ کو یہ پیغام دیتے ہوئے کہا ہے کہ سیاسی جماعتوں کو سکول کلاس روم کی طرح نہیں چلایا جا سکتا۔

عمران خان نے ملاقات کے دوران پارٹی رہنماﺅں کو الزام تراشی کا کھیل کھیلنے کی بجائے اتحاد کی ضرورت پر زور دیا۔گزشتہ روزجیل میںبانی پی ٹی آئی سے ہونے والی ملاقات کے دوران پارٹی کے حساس امور پر بھی تبادلہ خیال کیا گیا۔

(جاری ہے)

اس کے علاوہ امریکہ میں مقیم پارٹی رہنماء اور بلاگر کے بارے میں بانی پی ٹی آئی عمران خان نے پارٹی چیئرمین بیرسٹرگوہر کو مشورہ دیا کہ انہیں پارٹی کی سیاسی اور کور کمیٹیوں سے باضابطہ طورپر ہٹانے کیلئے یہ مناسب وقت نہیں تاہم عمران خان نے یہ ہدایت کی کہ انہیں صرف کمیٹی کے اجلاسوں میں مدعو نہ کیا جائے۔

پارٹی کے ایک اندرونی ذریعے کا کہنا ہے کہ پارٹی رہنما اپنے روئیے پر سینئر رہنماﺅں میں بڑھتے عدم اطمینان کی وجہ سے پہلے ہی کچھ عرصے سے ان فورمز سے غیر حاضر ہیں۔ ذرائع نے مزید کہا کہ رہنما کو معلوم ہے کہ انہیں کمیٹیوں سے ہٹانے پر غور کیا جا رہا ہے۔ بانی پی ٹی آئی عمران سے ملاقات کے دوران سینیٹر اعظم سواتی کا مسئلہ بھی مختصراً زیر بحث آیا۔

عمران خان نے یہ بات دہرائی کہ وہ ملک کی خاطر ملٹری سٹیبلشمنٹ کے ساتھ بات چیت کیلئے تیار ہیں انہوں نے کبھی بھی اعظم سواتی یا کسی اور کو اپنی طرف سے ذاتی ریلیف لینے کا اختیار نہیں دیا۔ بانی پی ٹی آئی عمران خان نے اعظم سواتی کے تعلقات کے بارے میں شکوک کا اظہار کیا تاہم انہوں نے اس بات پر زور دیا کہ مذاکرات کے حوالے سے ان کا موقف تبدیل نہیں ہوا جو پاکستان کی بہتری، جمہوریت اور قانون کی بالادستی کیلئے ہے۔

بتایا گیا ہے کہ یہ تنازع اس وقت پیدا ہوا جب اڈیالہ جیل کی انتظامیہ نے بانی پی ٹی آئی عمران خان کی بہن علیہ خان اور فیملی کے دیگر افراد کو عمران خان سے ملنے سے روک دیا تھا لیکن 5 وکلاء یعنی پارٹی چیئرمین بیرسٹر گوہر اور سینیٹر علی ظفر سمیت 5 افراد کوبانی پی ٹی آئی سے ملاقات کی اجازت دی تھی۔ اس وقت سلمان اکرم راجہ کو خود بھی ملاقات کی اجازت نہیں دی گئی تھی۔

سلمان اکرم راجہ نے بعد میں عوامی سطح پر اس اقدام پر تنقید کی تھی۔ انہوں نے کہا تھا انتظامیہ کے منظور نظرلوگوں کو ملاقات کی اجازت دی گئی۔ اس بیان پر پارٹی چیئرمین بیرسٹرگوہر نے سخت رد عمل کا اظہار کیا تھا اور سلمان اکرم راجہ کو یاد دلایا تھاکہ پارٹی نے ایسے حالات میں کبھی عمران خان سے ملاقات کے بائیکاٹ پر راضی نہیں ہوئی تھی۔ بیرسٹر گوہر علی خان نے یاد دہانی کرائی تھی کہ 25 مارچ کو جب عمران خان کی بہنوں کو بھائی سے ملاقات کی اجازت نہیں دی گئی تھی اس وقت سلمان اکرم راجہ کو عمران خان سے ملنے کی اجازت ملی تھی۔