ججز کے تبادلے کیخلاف کیس، اسلام آباد ہائیکورٹ بار ایسوسی ایشن کا آئینی درخواست واپس لینے کا فیصلہ

ہائیکورٹ بار کے صدر واجد گیلانی اور سیکرٹری منظور ججہ کی جانب سے باقاعدہ اتھارٹی لیٹر جاری کر دیاگیاجس میں درخواست واپس لینے کی منظوری دی گئی

Faisal Alvi فیصل علوی بدھ 16 اپریل 2025 14:47

ججز کے تبادلے کیخلاف کیس، اسلام آباد ہائیکورٹ بار ایسوسی ایشن کا آئینی ..
 اسلام آباد(اردوپوائنٹ اخبار تازہ ترین۔16اپریل 2025)اسلام آباد ہائیکورٹ بار ایسوسی ایشن نے ججز کے تبادلے کیخلاف کیس میں اپنی دائر کرد ہ آئینی درخواست واپس لینے کا فیصلہ کرلیا، کیس کل سپریم کورٹ میں سماعت کیلئے مقرر ہے،ہائیکورٹ بار کے صدر واجد گیلانی اور سیکرٹری منظور ججہ کی جانب سے باقاعدہ اتھارٹی لیٹر جاری کر دیاگیاجس میں درخواست واپس لینے کی منظوری دی گئی ۔

اسلام آباد ہائیکورٹ بار کی جانب سے جاری کردہ اتھارٹی لیٹر میں ایڈووکیٹ آن ریکارڈ انیس محمد شہزاد کو آئینی درخواست واپس لینے کا اختیار دیا گیا ہے۔اسلام آباد ہائیکورٹ بار ایسوسی ایشن نے ججز کے تبادلے اور سنیارٹی کے معاملے پر سپریم کورٹ میں فریق بننے کی درخواست دائر کی تھی۔واضح رہے کہ گزشتہ روزسپریم کورٹ کے آئینی بینچ نے اسلام آباد ہائیکورٹ کے ججز کی نئی سنیارٹی لسٹ معطل کرنے اور ٹرانسفر ہونے والے ججز کو کام سے روکنے کی استدعا بھی مسترد کر دی تھی۔

(جاری ہے)

سپریم کورٹ میں اسلام آباد ہائیکورٹ کے ججز کے تبادلے اورسنیارٹی سے متعلق درخواستوں پر سماعت جسٹس محمد علی مظہر کی سربراہی میں 5 رکنی آئینی بینچ نے کی تھی۔جسٹس محمد علی مظہر نے کہاتھا کہ اس معاملے پر ہمارے سامنے سات درخواستیں آئی تھیں۔سینارٹی کیس میں پانچوں جج بھی ہمارے سامنے درخواست لائے، کیوں نہ ہم ججز کی درخواست کو ہی پہلے سنیں۔

عدالت نے 5 ججز کی درخواست پر نوٹسز جاری کرتے ہوئے قائم مقام چیف جسٹس اسلام آباد ہائیکورٹ سرفراز ڈوگر، جسٹس خادم حسین، جسٹس محمد آصف اورجوڈیشل کمیشن سمیت اٹارنی جنرل پاکستان کو بھی نوٹس جاری کرتے ہوئے سماعت 17اپریل تک ملتوی کردی تھی۔قبل ازیں بھی اسلام آباد ہائیکورٹ نے ڈیپوٹیشن پر وفاقی دارالحکومت آنے والے ججز کو واپس اپنے ڈیپارٹمنٹ بھیجنے کے سروس ٹریبونل کے فیصلے کے خلاف اپیل پر وزارت قانون و انصاف سے دو ہفتوں میں جواب طلب کیاتھا۔عدالت نے معاملہ سنجیدہ نوعیت کا قرار دیتے ہوئے اٹارنی جنرل سے بھی معاونت طلب کی تھی۔