انسانی اعضاء کی پیوندکاری کے غیر قانونی کاروبار میں ملوث عناصر کے گرد گھیرا تنگ کرنے جا رہے ہیں‘خواجہ سلمان رفیق

وزیر صحت کی زیر صدارت پنجاب ہیومن آرگن ٹرانسپلانٹیشن اتھارٹی میں اہم اجلاس ،پی ہوٹا کو ترمیمی بل کو بھی فولواپ کرنے کی ہدایت

جمعرات 17 اپریل 2025 21:34

انسانی اعضاء کی پیوندکاری کے غیر قانونی کاروبار میں ملوث عناصر کے گرد ..

لاہور (اُردو پوائنٹ اخبارتازہ ترین - این این آئی۔ 17 اپریل2025ء) صوبائی وزیر صحت خواجہ سلمان رفیق کی زیر صدارت پنجاب ہیومن آرگن ٹرانسپلانٹیشن اتھارٹی میں اہم اجلاس منعقدہوا۔اس موقع پر ڈائریکٹر جنرل پی ہوٹا پروفیسر محمد عامر زمان خان، وائس چانسلر کنگ ایڈورڈ میڈیکل یونیورسٹی پروفیسر محمود ایاز، وائس چانسلر فاطمہ جناح میڈیکل یونیورسٹی پروفیسر خالد مسعود گوندل، صدر پاکستان میڈیکل ایسوسی ایشن ڈاکٹر محمد اظہار چوہدری، پروفیسر شہزاد انور، چیئرمین بورڈ سمز پروفیسر اسد اسلم خان، ڈپٹی سیکرٹری حافظ عرفان، سی ای او پنجاب ہیلتھ انشی ایٹو مینجمنٹ کمپنی ڈاکٹر علی رزاق، پرنسپل سرگودھا میڈیکل کالج پروفیسر محمد وارث فاروقہ و دیگر نے شرکت کی۔

اجلاس کے دوران پنجاب ہیومن آرگن ٹرانسپلانٹیشن اتھارٹی کے تمام سابق ڈائریکٹرز جنرل کی خدمات کو سراہا گیا۔

(جاری ہے)

اس موقع پر پی ہوٹا کے تمام ڈائریکٹرز نے بھی شرکت کی۔پی ہوٹا کو ترمیمی بل کو بھی فولواپ کرنے کی ہدایت کی گئی۔انسانی اعضاء کی پیوندکاری کے غیر قانونی کاروبار میں ملوث عناصر کے گرد گھیرا تنگ کرنے جا رہے ہیں۔پی ہوٹا کے ویجیلنس سیل کی کارکردگی کو بھی سراہا گیا ہے۔

صوبائی وزیر محکمہ سپیشلائزڈ ہیلتھ کیئر اینڈ میڈیکل ایجوکیشن خواجہ سلمان رفیق نے کہاکہ وزیر اعلیٰ پنجاب مریم نواز شریف کی قیادت میں عوام کیلئے صحت کے بنیادی اقدامات اٹھائے جا رہے ہیں۔چیف منسٹرز چلڈرن ہارٹ سرجری پروگرام، چیف منسٹرز ڈائیلسز پروگرام اور چیف منسٹرز سپیشل انشی ایٹو فار ٹرانسپلانٹ پروگرام حکومت پنجاب کے فلیگ شپ پروگرامز ہیں۔

خواجہ سلمان رفیق نے کہاکہ پی ہوٹا کی دیگر صوبوں کی اتھارٹیز سے بھی کوآرڈی نیشن کو بڑھائیں گے۔ پی ہوٹا کو ڈونرز کی رجسٹری بنانے کی ہدایت کی گئی ہے۔ پی ہوٹا کے سب آفسز کو بھی مزید فعال بنائیں گے۔ چیف منسٹرز سپیشل انشی ایٹو فار ٹرانسپلانٹ پروگرام کے حوالے سے پی ہوٹا کو اہم ٹاسکس سونپے گئے ہیں۔ صوبائی وزیرصحت نے کہاکہ عوام تک صحت کی بہترین سہولیات کی فراہمی کیلئے کوشاں ہیں۔ پنجاب میں انسانی اعضاء کی غیر قانونی پیوندکاری کا کاروبار چلنے نہیں دیں گے۔ ڈی جی پی ہوٹا کو اس حوالے سے متحرک کردار ادا کرنے کی ہدایت کی گئی ہے۔