Live Updates

بات چیت کیلئے عارف علوی کا انتظار کر رہا ہوں‘ ڈیل کی بات کرنے والوں کی عقل چلی گئی ہے، اعظم سواتی

ابھی حتمی طور پر کچھ نہیں کہا جاسکتا تاہم یہ بات چیت عمران خان کی رہائی کیلئے نہیں ہونی؛ پی ٹی آئی رہنماء کی میڈیا سے گفتگو

ساجد علی ہفتہ 19 اپریل 2025 13:33

بات چیت کیلئے عارف علوی کا انتظار کر رہا ہوں‘ ڈیل کی بات کرنے والوں ..

اسلام آباد ( اُردو پوائنٹ اخبارتازہ ترین۔ 19 اپریل 2025ء ) پاکستان تحریک انصاف کے رہنماء اعظم سواتی کا کہنا ہے کہ جو لوگ کہتے ہیں کوئی ڈیل ہورہی ہے ان کی عقل چلی گئی ہے۔ میڈیا سے گفتگو کرتے ہوئے انہوں نے کہا کہ عمران خان نے پوری دنیا کو بتا دیا ہے کہ حقیقی آزادی کے لیے اس نے اپنی ذات کی، اپنی اہلیہ کی اور اپنے ورکرز کی قربانی دی ہے اب جو لوگ یہ کہتے ہیں کہ کوئی ڈیل ہو رہی ہے تو ان کی عقل چلی گئی ہے، عمران خان تو تاریخ میں اپنا نام رقم کر چکا ہے، عمران خان اور کارکن آپس میں جڑ چکے ہیں، میں نے عمران خان کو بتایا کہ میرا مانسہرہ میں ایک لاکھ تو کیا ایک سو ووٹ بھی نہیں ہے۔

اسٹیبلشمنٹ سے مذاکرات سے متعلق ایک سوال کے جواب میں تحریک انصاف کے رہنماء نے کہا کہ باقاعدہ بات چیت کیلئے سابق صدر مملکت عارف علوی کا انتظار کر رہا ہوں، عارف علوی نے پچھلے ہفتے آنا تھا اب وہ شاید اگلے ہفتے آرہے ہیں لیکن بات چیت کے حوالے سے ابھی حتمی طور پر کچھ نہیں کہا جاسکتا تاہم یہ بات چیت عمران خان کی رہائی کیلئے نہیں ہونی ہے۔

(جاری ہے)

دوسری طرف پاکستان تحریک انصاف کے بانی چیئرمین عمران خان کہہ چکے ہیں کہ میں نے کسی کو اسٹیبلشمنٹ سے بات کرنے کا نہیں کہا، علی امین اور اعظم سواتی اپنے تئیں مذاکرات کرنا چاہتے تھے، اس کے لیے علی امین گنڈاپور اور اعظم سواتی نے مذاکرات کی خواہش کا اظہار ضرور کیا تھا لیکن میرے نزدیک مذاکرات لامعنی ہیں کیوں کہ دوسرے فریق کی نیت مسائل کے حل کی بجائے محض کچھ مزید وقت مستعار لینے کی ہوتی ہے، اس لیے جب اعظم سواتی اور علی امین گنڈا پور نے اجازت مانگی تو ان سے کہا اگر ڈیل کرنی ہوتی تو دو سال پہلے ہی کرلیتے۔