مشرقی افریقی ممالک کے ساتھ نئی سمندری تجارتی راہداریاں شروع کریں گے، جنید انوار

ہفتہ 19 اپریل 2025 15:24

اسلام آباد (اُردو پوائنٹ اخبارتازہ ترین - این این آئی۔ 19 اپریل2025ء)وفاقی وزیر برائے بحری امور جنید انوار چوہدری نے کہا ہے کہ پاکستان مشرقی افریقی ممالک کے ساتھ تجارتی روابط کو فروغ دینے کے لیے نئی سمندری راہداریاں قائم کر یگا، بندرگاہوں کی مؤثر رابطہ کاری کے ذریعے بین الاقوامی تجارت کو فروغ دینا حکومت کی اولین ترجیح ہے۔ اپنے ایک بیان میں انہوں نے بتایا کہ مشرقی افریقی کمیونٹی میں 8 ممالک شامل ہیں جن کی مجموعی آبادی 500 ملین سے زائد ہے،یہ خطہ پاکستان کے لیے تجارتی لحاظ سے نہایت اہمیت کا حامل ہے۔

جنید انوار چوہدری نے کہا کہ کراچی پورٹ سے جبوتی تک براہ راست شپنگ لائن قائم کی جائے گی، جو صومالیہ اور ایتھوپیا سمیت پورے خطے تک تجارتی رسائی کا گیٹ وے ثابت ہوگی، اس اقدام سے نہ صرف ترسیل کا وقت کم ہوگا بلکہ لاگت میں بھی نمایاں کمی آئے گی۔

(جاری ہے)

وفاقی وزیر نے کہا کہ گوادر پورٹ کو ایک مضبوط برآمداتی مرکز بنائیں گے، جہاں سے مشرق وسطیٰ اور افریقی ممالک تک براہ راست رسائی کے لیے تمام تر سہولتیں فراہم کی جائیں گی۔

انہوں نے کہا کہ یہ تجارتی راہداریاں نہ صرف پاکستان کی برآمدات میں اضافہ کریں گی بلکہ افریقی ممالک کے ساتھ معاشی تعلقات کو بھی مزید مضبوط بنائیں گی۔جنید انوار چوہدری نے کہا کہ پاکستانی مصنوعات کی مشرقی افریقی مارکیٹ میں زبردست مانگ موجود ہے، خصوصاً زراعت، ٹیکسٹائل اور ٹیکنالوجی کے شعبوں میں وسیع تجارتی مواقع دستیاب ہیں۔ انہوںنے کہاکہ ان نئی راہداریوں سے پاکستانی صنعتکاروں اور سرمایہ کاروں کو براہ راست افریقی منڈیوں تک رسائی حاصل ہوگی۔