حکمران خوف کھاتے ہیں مگر امت سوئی ہوئی نہیں، جلد آئندہ کے لائحہ عمل کا اعلان کروں گا، حافظ نعیم

اسلام آباد ( اُردو پوائنٹ اخبارتازہ ترین۔ 20 اپریل 2025ء ) امیر جماعت اسلامی حافظ نعیم الرحمان کا کہنا ہے کہ حکمران امریکہ اور اسرائیل سے خوف کھاتے ہیں مگر امت سوئی ہوئی نہیں، جلد آئندہ کے لائحہ عمل کا اعلان کروں گا۔ اسلام آباد میں غزہ مارچ سے خطاب کرتے ہوئے انہوں نے کہا کہ اگر ہم یہ سمجھتے ہیں کہ امریکہ اور اسرائیل کی خدمت کرکے عزت حاصل کرسکتے ہیں تو یاد رکھیں امریکہ کسی کا بھی نہیں ہے وہ صرف دہشت گردوں کو سپورٹ کرتا ہے اور ہم سب اس کا نشانہ ہیں، امریکہ مسلمانوں اور انسانوں کا قاتل ہے، امریکہ کے نوجوان خود اس کے خلاف احتجاج کررہے ہیں، یونیورسٹیوں کے طلباء و طالبات فلسطین کی حمایت میں احتجاج کررہے ہیں۔

حافظ نعیم الرحمان کہتے ہیں کہ بیت المقدس یہودیوں کے قبضے میں ہے، یہ عربوں اور فلسطینیوں کی سرزمین ہے جس پر یہودی جبراً مسلط کردیے گئے ہیں، مغربی کنارے میں بھی انہوں نے ایک لاکھ لوگ بے گھر کیے گئے ہیں، قبضے کا یہ سلسلہ رکے گا نہیں ہمیں روکنا پڑے گا، ہمیں متحد ہونا پڑے گا، عالم اسلام کو بھی جگانا پڑے گا، اور باضمیر ممالک جو اس وقت اسرائیل کے خلاف ہیں انہیں اکٹھا کرنا پڑے گا، کوئی اور یہ کام کرے نہ کرے، پاکستان کو یہ کام کرنا ہوگا، لوگ پاکستان کی طرف بہت امید سے دیکھتے ہیں، قائداعظم نے اسرائیل کو مغرب اور استعمال کی ناجائز اولاد قرار دیا اور اعلان کردیا تھا کہ پاکستان اسرائیل کو کبھی تسلیم نہیں کرے گا۔

(جاری ہے)

انہوں نے کہا کہ ہم نے امریکی سفارتخانے کی طرف مارچ کا کہا تھا لیکن حکمران امریکہ سے خوف کھاتے ہیں، اسرائیل سے ڈرتے ہیں، اس لیے انہوں نے اسلام آباد بند کیا مگر ہم کسی بندوق اور گولی سے ڈرنے والے نہیں، یہ ہمارا راستہ نہیں روک سکتے تھے مگر ہم پولیس والوں کے ساتھ تصادم نہیں کرنا چاہتے، حکمران سوئے ہوئے ہیں مگر امت سوئی ہوئی نہیں ہے، اسرائیلی وحشت روکنے کیلئے ہمیں متحد ہونا پڑے گا، یہ سیاسی نعرے بازی نہیں ہمارے ایمان کا معاملہ ہے۔

امیر جماعت اسلامی نے حکمرانوں کو ہدف تنقید بناتے ہوئے کہا کہ ظالم حکمرانوں نے تباہی پھیر دی ہے اور ملک بھر میں مسائل ہیں، اس وجہ سے مظلوموں کی طاقت تقسیم کردی گئی ہے، ہمیں بلوچ، پنجابی، سندھی، پختونوں میں تقسیم کردیا گیا ہے، ہمیں متحد ہوکر ان ظالموں اور جابروں اور امریکا کے غلاموں کو تقسیم کرنا ہوگا، پھر کسی کا حق نہیں مارا جائے گا، میں ملک بھر کے عوام سے کہتا ہوں کہ متحد ہوجاؤ اور ان ظالموں سے اپنا حق حاصل کرو۔