پاکستان کا کوئی منصوبہ چاروں بھائیوں کو اعتماد میں لئے بغیر مکمل نہیں ہونا چاہیے‘ راجہ پرویز اشرف

کالاباغ ڈیم پر بھی کسی کو اعتماد میں نہ لیا گیا پھر کسی سے یہ منصوبہ مکمل نہ ہو سکا ‘ صدر پیپلز پارٹی وسطی پنجاب

اتوار 20 اپریل 2025 22:20

لاہور(اُردو پوائنٹ اخبارتازہ ترین - این این آئی۔ 20 اپریل2025ء)سابق وزیراعظم اور پاکستان پیپلز پارٹی وسطی پنجاب کے صدر راجہ پرویز اشرف نے کہا ہے کہ پاکستان کا کوئی منصوبہ چاروں بھائیوں کو اعتماد میں لئے بغیر مکمل نہیں ہونا چاہیے، کالاباغ ڈیم پر بھی کسی کو اعتماد میں نہ لیا گیا پھر کسی سے یہ منصوبہ مکمل نہ ہو سکا ،صوبوں میں اختلافات پیدا ہوگئے حتی کہ پچاس سال مکمل ہو گئے مگر کوئی آمر بھی اسے مکمل نہ کر سکا تھا ۔

(جاری ہے)

وہ پیپلز پارٹی پنجاب کے ڈپٹی جنرل سیکرٹری عثمان ملک سے ان کی والدہ کی وفات پر تعزیت کے بعد میڈیا سے گفتگو کر رہے تھے۔اس موقع پر پیپلز پارٹی وسطی پنجاب کے جنرل سیکرٹری سید حسن مرتضی ،چودھری اسلم گل،احسن رضوی،ڈاکٹر مبشر،آغا تقی سمیت دیگر رہنما بھی موجود تھے۔راجہ پرویز اشرف نے کہا کہ بھاشا ڈیم متبادل ہے تو اس پر کسی کو اعتراض نہیں، اسے مکمل کریں،ہم وفاق کو جوڑنے والے لوگ ہیں۔ انہوں نے کہا کہ کینال منصوبے پر دانش کے ساتھ کام ہونا چاہیے ۔انہوں نے مزید کہا کہ پیپلز پارٹی ، مسلم لیگ (ن) کے ساتھ وفاق میں اتحاد میں ہے، اہم ایشو پر بات کرتے ہیں،پیپلز پارٹی ایک انتخابی جماعت ہے۔