لاہور میں پرامن بسنت منانے کا مشن، وزیر اعلیٰ کے حکم پر کمیٹی تشکیل

بسنت آئندہ سال فروری میں منانے کی تجویز زیر غور ہے،بسنت کے لیے کئی اہم ایس او پیز بھی تیارکر لیے گئے

پیر 21 اپریل 2025 17:05

لاہور(اُردو پوائنٹ اخبارتازہ ترین - این این آئی۔ 21 اپریل2025ء)پنجاب حکومت نے آئندہ سال لاہور میں بسنت کے تہوار کو محفوظ انداز میں منانے کیلئے تیاریاں شروع کر دی ہیں۔ وزیر اعلیٰ پنجاب کی ہدایت پر محفوظ بسنت کے انعقاد کے حوالے سے اعلیٰ سطحی کمیٹی قائم کر دی گئی ہے۔ذرائع کے مطابق بسنت آئندہ سال فروری میں منانے کی تجویز زیر غور ہے، جس کے لیے دو مخصوص دن مختص کیے جا سکتے ہیں۔

اس دوران لاہور کے اندرون شہر کو بسنت کے مرکزی مقامات کے طور پر استعمال کرنے کا امکان ظاہر کیا گیا ہے۔موٹر سائیکل پر دو دن کی پابندی کی تجویز بھی زیر غور ہے تاکہ بسنت کے دوران کسی قسم کے ناخوشگوار واقعے سے بچا جا سکے۔محفوظ بسنت کو یقینی بنانے کے لیے کئی اہم ایس او پیز بھی تیار کیے جا رہے ہیں،ایس او پیز کے مطابق پتنگ اور ڈور کی خرید و فروخت صرف ضلعی انتظامیہ کے رجسٹرڈ افراد ہی کر سکیں گے۔

(جاری ہے)

ڈور بنانے والے کاریگر کو بھی ضلعی انتظامیہ کے ساتھ رجسٹرڈ ہونا لازم ہوگا۔ایس او پیز میں بتایا گیا ہے کہ ڈور کی تیاری میں شیشہ یا دیگر خطرناک مواد کے استعمال پر مکمل پابندی ہوگی۔ڈور کی تیاری کے بعد ضلعی انتظامیہ اس کا معائنہ کرے گی تاکہ محفوظ مواد کی تصدیق ہو سکے۔ان ایس او پیز کی خلاف ورزی کرنے والوں کے خلاف سخت کارروائی کی جائے گی۔حکام کا کہنا ہے کہ اس سال کا بسنت فیسٹیول روایتی ثقافتی رنگ کے ساتھ مگر تحفظاتی اقدامات کے تحت منایا جائے گا تاکہ ماضی کی طرح کسی بھی قیمتی جان کا نقصان نہ ہو۔