حلال گوشت کی ایکسپورٹ میں اضافے کیلئے ملائشیا کیساتھ بات چیت جاری ہے، رانا تنویر حسین

معاہدہ طے پا گیا تو دونوں ممالک کے درمیان مضبوط تعلقات قائم ،5سالوں میں 200ملین ڈالر کی برآمدات ہوگی ، وفاقی وزیر کا اجلاس میں اظہار خیال

پیر 21 اپریل 2025 21:40

اسلام آباد (اُردو پوائنٹ اخبارتازہ ترین - این این آئی۔ 21 اپریل2025ء) وفاقی وزیر قومی غذائی تحفظ رانا تنویر حسین نے کہا کہ حلال گوشت کی ایکسپورٹ میں اضافے کیلئے ملائشیا کیساتھ بات چیت جاری ہے، معاہدہ طے پا گیا تو دونوں ممالک کے درمیان مضبوط تعلقات قائم ،5سالوں میں 200ملین ڈالر کی برآمدات ہوگی ۔ پیر کو جاری بیان کے مطابق وفاقی وزیر قومی غذائی تحفظ و تحقیق رانا تنویر حسین،وفاقی وزیر برائے تجارت جام کمال اور وزیر اعظم کے مشیر برائے انڈسٹری ہارون اختر خان نے گوشت کی حلال برآمد کے متعلق اجلاس میں شرکت کی جہاں گوشت کی برآمدات کو بڑھانے کے متعلق مختلف سفارشات پر غور کیا گیا۔

اجلاس میں اظہار خیال کرتے ہوئے وفاقی وزیر رانا تنویر حسین نے کہا کہ وزیراعظم میاں محمد شہباز شریف حلال گوشت کی ایکسپورٹ میں اضافہ کرنا چاہتے ہیں اور اس سلسلے میں ملائشیا کے ساتھ بات چیت ہورہی ہے۔

(جاری ہے)

وفاقی وزیر نے کہا کہ اگر ملائشیا کے ساتھ گوشت کی برآمدات کے متعلق معاہدہ طے پا جاتا ہے تو 5 سالوں میں 200 ملین ڈالر کی برآمدات ہوگی اور مجموعی طور پر دونوں ممالک کے درمیان ایک مضبوط تعلقات قائم ہوں گے۔

انہوں نے کہا کہ دونوں ممالک کے درمیان تجارت، سرمایہ کاری سمیت مختلف شعبوں میں تعاون کے فروغ کے وسیع مواقع موجود ہیں۔ انہوں نے کہا کہ پاکستان اور ملائیشیا کے تعلقات کو مضبوط بنانے کے لئے تجارت، آئی ٹی، توانائی، زراعت، حلال گوشت کی برآمدات،سمیت باہمی مفاد کے شعبوں میں تعاون کو تقویت دے سکتے ہیں، اب یہ ہم پر منحصر ہے کہ ہم اس موقع سے کس طرح فائدہ اٹھاتے ہیں، ہم اعلی معیار کی مصنوعات کا تبادلہ کر سکتے ہیں، ملائیشیا کو اعلی قسم کا حلال گوشت جلد برآمد کریں گے انہوں نے یقین دلایا کہ پاکستان معیار پر کوئی سمجھوتہ نہیں کرے گا، یاد رہے کہ ملائیشین وزیراعظم انور ابراہیم کے حالیہ دورہ پاکستان کے دوران اس بات پر اتفاق پایا گیا تھا کہ پاکستان ملائیشیا کو 20 کروڑ ڈالر مالیت کا حلال گوشت برآمد کرے گا۔