رانا مشہود احمد خان کی یوتھ انفلوئنسر زسے ملاقات،نوجوانوں کو با اختیار بنانے کے لیے سوشل پلیٹ فارم زمہ داری سے استعمال کرنے پر زور

اسلام آباد(اُردو پوائنٹ اخبارتازہ ترین - این این آئی۔ 23 اپریل2025ء) پرائم منسٹر یوتھ پروگرام کے چیئرمین رانا مشہود احمد خان نے وزیراعظم آفس میں بااثر نوجوانوں سے ملاقات کی۔ چیئرمین رانا مشہود احمد خان کی سربراہی میں ہونے والی ملاقات میں وزیراعظم یوتھ پروگرام کی ٹیم کے اراکین کے ساتھ پاکستان بھر کے مختلف شہروں سے تقریباً 20 نوجوان انفلوئنسر زموجودتھے۔

اس موقع پربین الاقوامی جہت کا اضافہ کرتے ہوئے، نائیجیریا کے ایک انفلوئنسر نے بھی شرکت کی،نوجوانوں کو بااختیار بنانے اور مشغولیت کے اقدامات پر توجہ مرکوز کرتے ہوئے سیشن انتہائی نتیجہ خیز رہا۔ شرکت کرنے والوں میں فہد ملک، اریب اظہر، عینی قریشی، شاہ رخ خان، لامیہ خان، ندا، بسمہ نور، ابیولا اطوباتیلے، دانش زرنش، صہیب رفاقت، ارسلان منیر، سبطین زاہد، خواجہ اجلال، چاندنی عروج، عبدالرحمن،سدرہ علی نقوی اور مشعال شفیق شامل تھے۔

(جاری ہے)

چیئرمین وزیراعظم یوتھ پروگرام رانا مشہود احمد خاں نے مہمانوں کا پرتپاک خیرمقدم کیا اور ای 4 پر روشنی ڈالی، جو بامعنی اقدامات کے ذریعے نوجوانوں کو بااختیار بنانے کے گرد گھومتا ہے۔انہوں نے قومی رضاکار کور سمیت اہم اقدامات کے بارے میں ایک جامع بریفنگ فراہم کی جس کا مقصد پاکستان کے نوجوانوں کی بے پناہ غیر استعمال شدہ صلاحیتوں کو کھولنا ہے۔

انہوں نے ڈیجیٹل یوتھ ہب بھی متعارف کرایا، جس کا آغاز 26 مارچ کو کیا گیا تھا۔ اس کے آغاز سے اب تک دس لاکھ بائیس ہزار، چار سو چوبیس نوجوانوں نے وزیراعظم یوتھ پروگرام کی اپلیکیشن ڈائون لوڈ کی ہے۔ انہوں نے کہا کہ نوجوانوں کی شمولیت کے بعد تعلیم اگلی اہم ترجیح ہوگی۔ملاقات کے دوران جن اہم اقدامات پر تبادلہ خیال کیا گیا ان میں وزیراعظم یوتھ لون سکیم، آئیڈیاز اور انکیوبیشن سینٹرز کا قیام، ای سپورٹس کی ترقی اور 2028 کے اولمپکس میں شرکت کے لیے پاکستان کی اسٹریٹجک منصوبہ بندی شامل تھی۔

یوتھ انفلوئنسرز کو اپنے پلیٹ فارمز کو ذمہ داری کے ساتھ استعمال کرنے کی ترغیب دی گئی، اس پیغام کے ساتھ کہ آپ نوجوانوں کی آواز ہیں - لوگ آپ کو سنتے ہیں۔ نوجوانوں میں امید اور مثبت پیغام پہنچائیں۔انہوں نے اجتماعی ذمہ داری پر زور دیا اور تعمیری تنقید کا خیرمقدم کیا۔اس موقع پر شرکاء نے قیمتی آراء کا اشتراک کیا۔ انہوں نے حکومت پر زور دیا کہ وہ مختلف میڈیا چینلز کے ذریعے مقامی اور عالمی سطح پر پاکستان کے مثبت تشخص کو فروغ دے۔شرکاء نے یوتھ افیئرز ونگ کی طرف سے شروع کئیگئے کھلے مکالمے اور شمولیتی نقطہ نظر کی بھی تعریف کی اور اسے نوجوانوں کی حقیقی شمولیت کی طرف ایک اہم قدم قرار دیا۔