Live Updates

سندھ کے سینئروزیرکی سندھ طاس معاہدے کو معطل کرنے والے بھارتی اقدام شدید مذمت

بھارت کی جانب سے سندھ طاس معاہدے کو معطل کرنے کا اقدام انتہائی اشتعال انگیز اور غیر ذمہ دارانہ ہے،شرجیل انعام میمن

جمعرات 24 اپریل 2025 20:35

کراچی(اُردو پوائنٹ اخبارتازہ ترین - این این آئی۔ 24 اپریل2025ء)سندھ کے سینئر وزیر شرجیل انعام میمن نے سندھ طاس معاہدے کو معطل کرنے والے بھارتی اقدام شدید مذمت کی ہے اور کہا ہے کہ سندھ طاس معاہدے کی معطلی کھلی جارحیت اور خطے میں امن کے لیے سنگین خطرہ ہے، بھارت کی جانب سے سندھ طاس معاہدے کو معطل کرنے کا اقدام انتہائی اشتعال انگیز اور غیر ذمہ دارانہ ہے۔

ایک بیان میں سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا کہ معاہدہ کی معطلی بین الاقوامی قوانین کی سنگین خلاف ورزی اور خطے میں جاری امن کی کوششوں کو سبوتاژ کرنے کی دانستہ کوشش ہے، بھارت ماضی میں بھی بین الاقوامی دوروں اور اہم مواقع پر فالس فلیگ آپریشنز کا سہارا لیتا آیا ہے تاکہ دنیا کی توجہ اصل مظالم اور ناانصافیوں سے ہٹائی جا سکے۔

(جاری ہے)

انہوں نے کہا کہ صدر کلنٹن کے دورہ بھارت کے دوران بھی بھارت نے ایک فالس فلیگ آپریشن میں بے گناہ سکھوں کا خون بہایا۔ آج ایک بار پھر پہلگام میں وہی پرانی چال دہرائی جا رہی ہے، پاکستان دہشتگردی کے خلاف عالمی مہم کا سب سے مثر اور متحرک حصہ رہا ہے۔ سینئر وزیر شرجیل انعام میمن نے کہا کہ ہم نے دہشتگردی کے خلاف جنگ میں اپنے ہزاروں شہریوں اور سیکیورٹی اہلکاروں کی جانوں کا نذرانہ پیش کیا ہے، اے پی ایس جیسے دلخراش سانحات سے لے کر عظیم قائد محترمہ بینظیر بھٹو شہید کی جان کا نذرانہ، ہماری قربانیوں کی طویل فہرست ہے۔

انہوں نے کہا کہ سندھ طاس معاہدے کی معطلی محض ایک آبی تنازعہ نہیں، یہ ایک واضح پیغام ہے کہ بھارت خطے میں طاقت کے زعم میں جنگ کی طرف بڑھ رہا ہے، پاکستان اس اشتعال انگیزی کو ہرگز برداشت نہیں کرے گا بھارتی اقدام اخلاقی دیوالیہ پن کی علامت اور عالمی برادری کے منہ پر طمانچہ ہے۔ انہوں نے کہا کہ عالمی طاقتیں، اقوام متحدہ اور انسانی حقوق کی تنظیمیں بھارت کی اس سنگین خلاف ورزی کا نوٹس لیں۔