Live Updates

وزیر اعلیٰ خیبر پختونخواکی پہلگام واقعے کے بعد بھارتی حکومت کے رویے کی شدید الفاظ میں مذمت

واقعے کے تناظر میں بھارتی حکومت کا جارحانہ رویہ افسوسناک اور ناقابل برداشت ہے، ہم بھارت کی طرف سے کسی بھی جارحیت کا منہ توڑ جواب دینے کے لئے ہر طرح سے تیار ہیں،علی امین گنڈاپور

جمعرات 24 اپریل 2025 21:30

پشاور(اُردو پوائنٹ اخبارتازہ ترین - این این آئی۔ 24 اپریل2025ء)وزیر اعلیٰ خیبر پختونخوا علی امین خان گنڈاپورنے پہلگام واقعے کے بعد بھارتی حکومت کے رویے کی شدید الفاظ میں مذمت کی ہے اور کہا ہے کہ واقعے کے تناظر میں بھارتی حکومت کا جارحانہ رویہ افسوسناک اور ناقابل برداشت ہے، ہم بھارت کی طرف سے کسی بھی جارحیت کا منہ توڑ جواب دینے کے لئے ہر طرح سے تیار ہیں۔

ان خیالات کا اظہار انہوں نے جمعرات کے روز پشاور میں صوبائی کابینہ کے 31ویں اجلاس سے خطاب کرتے ہوئے کیا۔وزیر اعلیٰ کا کہنا تھا کہ مودی سرکار ایک سوچی سمجھی سازش کے تحت پہلگام واقعے کو پاکستان کے خلاف استعمال کرنے کی ناکام کوشش کر رہی ہے، یہ واقعہ بھارتی حکومت کی ناکامی کا منہ بولتا ثبوت ہے۔ علی امین گنڈاپور نے واقعے میں قیمتی انسانی جانوں کے ضیاع پر افسوس کا اظہار کیا اور کہا کہ بھارتی حکومت اپنی نااہلی چھپانے کے لئے پاکستان کے خلاف زہر اگل رہی ہے۔

(جاری ہے)

انہوں نے واضح کیا کہ اگر بھارتی حکومت نے مذکورہ واقعے کی آڑ میں کسی بھی جارحیت کی کوشش کی تو اسے بھاری قیمت چکانی پڑے گی۔ وزیر اعلیٰ نے مزید کہا کہ ملک کی سا لمیت اور قومی مفاد کے لئے ہم سب متحد ہیں، اس سلسلے میں کسی بھی قربانی کے لئے تیار ہیں۔ بھارتی حکومت کا جارحانہ رویہ ہمیشہ سے خطے کے امن کے لئے خطرہ رہا ہے۔