سیکیورٹی فورسز کی بنوں میں کارروائی، 6خوارج ہلاک

ضلع بنوں میں دہشت گردوں کی موجودگی کی خفیہ اطلاع پر سیکیورٹی فورسز نے کارروائی کی، آئی ایس پی آر

جمعہ 25 اپریل 2025 21:40

بنوں (اُردو پوائنٹ اخبارتازہ ترین - این این آئی۔ 25 اپریل2025ء)خیبرپختونخوا کے ضلع بنوں میں سیکیورٹی فورسز نے خفیہ اطلاعات پر کارروائی کے دوران 6خوارج کو ہلاک ،4کو زخمی کردیا ۔ آئی ایس پی آر کے مطابق 23اور 24اپریل کی درمیانی شب سیکیورٹی فورسز نے ضلع بنوں میں خفیہ اطلاعات کی بنیاد پر دہشت گردوں (خوارج)کی موجودگی کی اطلاع پر آپریشن کیا۔

(جاری ہے)

بیان میں کہا گیا کہ کارروائی کے دوران سیکیورٹی فورسز نے مثر طریقے سے خوارج کے ٹھکانے کو نشانہ بنایا۔

آئی ایس پی آر کے مطابق شدید فائرنگ کے تبادلے کے بعد 6خوارج جہنم واصل کر دیئے گئے ،اس دوران 4خوارج زخمی ہوئے۔بیان میں مزید کہا گیا کہ علاقے میں کلیئرنس اور سینیٹائزیشن آپریشن جاری ہے تاکہ کسی بھی چھپے ہوئے دہشت گرد کو انجام تک پہنچایا جا سکے۔آئی ایس پی آر نے کہا کہ سیکیورٹی فورسز ملک سے دہشت گردی کے مکمل خاتمے کیلئے پرعزم ہیں۔