Live Updates

پاکستان کی سرزمین کی حرمت اور سالمیت پر کوئی سمجھوتہ نہیں ہو گا ،صوبائی مشیر نسیم الرحمن

ہفتہ 26 اپریل 2025 00:10

کوئٹہ (اُردو پوائنٹ اخبارتازہ ترین - اے پی پی۔ 26 اپریل2025ء) صوبائی مشیر ماحولیات و موسمیاتی تبدیلی نسیم الرحمن خان ملاخیل نے کہا ہے کہ دشمن کو یہ پیغام دینا ضروری ہے کہ پاکستانی ایک زندہ و تابندہ قوم ہیں، جو اپنی سلامتی کے معاملے میں کبھی کمزوری نہیں دکھائیں گے۔ اپنے ایک بیان میں انہوں نے عوام سے اپیل کی کہ وہ افواہوں اور منفی پروپیگنڈے سے ہوشیار رہیں اور قومی اداروں پر اعتماد کرتے ہوئے قومی یکجہتی کا مظاہرہ کریں ۔

صوبائی مشیر نسیم الرحمان نے قومی سلامتی کمیٹی کے حالیہ فیصلے کو سراہتے ہوئے اسے ملکی خودمختاری، قومی وقار اور سلامتی کے تحفظ کی جانب ایک نہایت بروقت، مدبرانہ اور جرات مندانہ قدم قرار دیا ۔ انہوں نے کہا کہ ایسے فیصلے نہ صرف قومی مفادات کی بھرپور ترجمانی کرتے ہیں بلکہ یہ ملک دشمن عناصر کو بھی واضح پیغام دیتے ہیں کہ پاکستان کی سرزمین کی حرمت اور سالمیت پر کوئی سمجھوتہ نہیں ہو گا انہوں نے کہا کہ موجودہ علاقائی اور عالمی حالات کے تناظر میں قومی سلامتی کمیٹی کا مؤقف قومی امنگوں کا عکاس ہے، جو ثابت کرتا ہے کہ پاکستان کی قیادت اپنی ذمہ داریوں سے بخوبی آگاہ ہے اور ملکی سلامتی پر کسی قسم کی مصلحت یا دباؤ کو قبول نہیں کرے گی۔

(جاری ہے)

انہوں نے کہا کہ بلوچستان کے غیور عوام ہر محاذ پر متحد اور پرعزم ہیں اور بھارتی اشتعال انگیزی کے خلاف ایک مضبوط دیوار کی مانند کھڑے ہیں۔ انہوں نے کہا کہ بلوچستان کے عوام اپنے وطن کے تحفظ، استحکام اور خودمختاری کے لیے افواجِ پاکستان اور قومی اداروں کے شانہ بشانہ ہیں اور ہر قسم کی قربانی کے لیے ہمہ وقت تیار ہیں ۔ انہوں نے کہا کہ دشمن کو یہ پیغام دینا ضروری ہے کہ ہم ایک زندہ و تابندہ قوم ہیں جو اپنی سلامتی کے معاملے میں کبھی کمزوری نہیں دکھائیں گے۔