Live Updates

پاکستان پُرامن ملک ، پوری قوم مادروطن کے دفاع کیلئے اپنی افواج کے شانہ بشانہ ہر قربانی دینے کو تیار ہے ،راجہ محمد حنیف

ہفتہ 26 اپریل 2025 22:00

راولپنڈی (اُردو پوائنٹ اخبارتازہ ترین - اے پی پی۔ 26 اپریل2025ء) چیئرمین وزیر اعلیٰ پنجاب انسپکشن ٹیم راجہ محمد حنیف نے کہا ہے کہ تاریخ گواہ ہے کہ جب بھی مادرِ وطن کو کسی خطرے کا سامنا ہوا، ہماری بہادر افواج نے پیشہ ورانہ مہارت، بے مثال قربانی اور جذبہ حب الوطنی سے دشمن کو منہ توڑ جواب دیا، آرمی چیف جنرل سید عاصم منیر کی قیادت میں پاک فوج مزید مضبوط، پیشہ ورانہ اور مستعد ہو چکی ہے، جنرل عاصم منیر کا ویژن، حب الوطنی اور بے مثال قیادت افواجِ پاکستان کو ناقابلِ تسخیر بنانے میں کلیدی کردار ادا کر رہی ہے۔

گزشتہ روز اجلاس سے خطاب کرتے ہوئے راجہ محمد حنیف نے کہا کہ پاکستان ایک پُرامن ملک ہے اور ہم خطے میں خوشگوار تعلقات کے خواہاں ہیں، تاہم اپنی آزادی اور خودمختاری پر کوئی سمجھوتہ نہیں کیا جائے گا۔

(جاری ہے)

انہوں نے کہا کہ پوری قوم سیاسی، علاقائی اور لسانی وابستگیوں سے بالاتر ہو کر اپنی افواج کے ساتھ یکجہتی کا مظاہرہ کر رہی ہے۔ آج کا پاکستان قومی عزم، یکجہتی اور ولولے کی روشن تصویر پیش کر رہا ہے۔

انہوں نے کہا کہ ہم دنیا کو واضح پیغام دینا چاہتے ہیں کہ اگر دشمن نے ارضِ پاک کی طرف میلی آنکھ سے دیکھنے کی جرات کی تو اسے ایسا عبرتناک جواب دیا جائے گا جو تاریخ میں سنہری الفاظ میں رقم ہو گا۔ ہماری یکجہتی، ہمارا عزم اور ہماری افواج کی جرات دشمن کے ہر ناپاک عزائم کو ناکام بنانے کے لیے کافی ہے۔ انہوں نے مزید کہا کہ پاکستان کی مسلح افواج قومی سلامتی، خودمختاری اور وقار کی عظیم علامت ہیں۔

افواج پاکستان اپنی جانوں کا نذرانہ پیش کر کے سرحدوں کی حفاظت کر رہی ہیں اور دشمن کی ہر سازش کو مؤثر انداز میں ناکام بنا رہی ہیں۔ انہوں نے کہا کہ ہماری سرزمین محفوظ ہاتھوں میں ہے اور ہمارے ادارے ہر لمحہ ملک دشمن قوتوں کے عزائم کو ناکام بنانے کے لیے چوکنا ہیں۔ راجہ محمد حنیف نے آرمی چیف جنرل سید عاصم منیر کی قائدانہ صلاحیتوں کو خراجِ تحسین پیش کرتے ہوئے کہا کہ جنرل عاصم منیر کی قیادت میں پاک فوج نے اندرونی و بیرونی چیلنجز کا جس حکمت اور حوصلے سے سامنا کیا، وہ پوری قوم کے لیے باعثِ فخر ہے۔ انہوں نے کہا کہ کسی بھی قسم کی جارحیت کی صورت میں پوری قوم اپنی افواج کے شانہ بشانہ، مادرِ وطن کے دفاع کے لیے ہر قربانی دینے کو تیار ہے۔