Live Updates

ملک میں پہلی بلٹ ٹرین چلانے کے فیصلے پر عملدرآمد کیلئے ورکنگ گروپ تشکیل

وزیر اعلیٰ پنجاب کی ہدایت پر سینئر صوبائی وزیر مریم اورنگزیب نے منصوبے کے حوالے سے پہلا اجلاس منعقد کیا

ساجد علی اتوار 27 اپریل 2025 17:05

ملک میں پہلی بلٹ ٹرین چلانے کے فیصلے پر عملدرآمد کیلئے ورکنگ گروپ ..

لاہور ( اُردو پوائنٹ اخبارتازہ ترین۔ 27 اپریل 2025ء ) وزیراعلیٰ پنجاب مریم نواز شریف کی ہدایت پر لاہور سے راولپنڈی تک پاکستان کی پہلی تیز ترین بلٹ ٹرین چلانے کا فیصلہ کیا گیا ہے، فیصلے پر عملدرآمد کیلئے ورکنگ گروپ تشکیل دے دیا گیا۔ تفصیلات کے مطابق وزیراعلیٰ پنجاب کی ہدایت پر سینیئر صوبائی وزیر مریم اورنگزیب اور وفاقی وزیر ریلوے حنیف عباسی کی زیر صدارت پہلا اجلاس منعقد ہوا، مریم اورنگزیب نے منصوبے کی فیزیبلٹی، ٹائم لائن کی تیاری کے لئے صوبائی وزیر ٹرانسپورٹ پنجاب بلال اکبر خان، مشیر وزیرعلیٰ پنجاب شاہد تارڑ، چیئرمین ریلوے، سی ای او ریلوے پہ مشتمل ورکنگ گروپ تشکیل دے دیا، مریم اورنگزیب ورکنگ گروپ کی تجاویز آئیندہ ہفتے وزیراعلیٰ کو پیش کریں گی۔

بتایا گیا ہے کہ یہ شہروں کے درمیان ٹرین کے ذریعے شہریوں کو جدید سفری سہولیات کی فراہمی کی وزیرِ اعلیٰ پنجاب کی ہدایت پر عملدرآمد کے حوالے سے یہ پہلا اجلاس تھا، لاہور اور راولپنڈی کے درمیان چلنے والی بلٹ ٹرین سوا دو سے اڑھائی گھنٹے میں فاصلہ طے کرے گی، نئے ریل روٹس کی نشاندہی کی جائے گی، سینئر صوبائی اسمبلی کو ریلوے حکام نے ریل نیٹ ورک اور پٹڑی سے متعلق تفصیلی بریفنگ دی گئی۔

(جاری ہے)

اجلاس سے خطاب کرتے ہوئے سینئر صوبائی وزیر مریم اورنگزیب نے کہا کہ بلٹ ٹرین کا آغاز کرکے نواز شریف اور مریم نواز شریف عوام سے اپنے ایک اور وعدے کو پورا کریں گے، وزیر اعلیٰ مریم نواز شریف عوام کے لیے سفر کی سستی، تیز ترین اور آرام دہ سہولیات چاہتی ہیں، وزیر اعلیٰ پنجاب کا ویژن ہے کہ ٹرین عوامی سواری ہے، اسے جدید معیار پر لانا ہے، وزیراعلٰی پنجاب مریم نواز کی ہدایت پر لاہور اور راولپنڈی کے ریلوے سٹیشن کی اپ گریڈیشن بھی پلان میں شامل ہے، محکمہ سیاحت پنجاب کے تعاون سے راولپنڈی تا لاہور ٹریک کو خوبصورت بنانے کی تجویز پر کام کریں گے۔