Live Updates

لاہور،مس کنڈکٹ پر 2ڈاکٹرز معطل، ایک برخاست، غیر حاضر ڈاکٹرز کی تنخواہ بند کرنے کا حکم

پیر 28 اپریل 2025 15:41

لاہور (اُردو پوائنٹ اخبارتازہ ترین - این این آئی۔ 28 اپریل2025ء) پنجاب حکومت کے محکمہ اسپیشلائزڈ ہیلتھ کیئر اینڈ میڈیکل ایجوکیشن نے مس کنڈکٹ پر 2ڈاکٹرز کو پیڈا ایکٹ کے تحت معطل اور ایک ڈاکٹر کو نوکری سے برخاست کردیا اور سرکاری ہسپتالوں سے غیرحاضر ڈاکٹرز کی تنخواہیں فوری بندکرنے کا حکم دیتے ہوئے ڈاکٹرز، نرسز اور عملے کی چھٹیوں پر پابندی عائد کردی۔

تفصیلات کے مطابق سروسز ہسپتال لاہور کے ڈاکٹر سلمان حسیب اور چلڈرن ہسپتال لاہور کے پی جی آر ڈاکٹر احمد یار کو معطل کردیا جبکہ جنرل ہسپتال لاہور کے ڈاکٹر محمد عامر بشیر کو نوکری سے برخاست کردیا گیا ہے۔ترجمان محکمہ سپیشلائزڈہیلتھ کیئر اینڈ میڈیکل ایجوکیشن کاکہنا تھاکہ بغیراطلاع غیر حاضر رہنے والے ڈاکٹر زکے واپس متعلقہ ہسپتال رپورٹ کرنے کے بعد تنخواہ بحال کی جائے گی۔

(جاری ہے)

اس حوالے سے تمام میڈیکل سپرنٹنڈنٹس کو ہدایات جاری کر دی گئی۔ محکمہ سپیشلائزڈ ہیلتھ کیئر اینڈ میڈیکل ایجوکیشن نے ہسپتالوں سے بغیر اجازت لئے غیر حاضر ہونے والے ڈاکٹرز کے خلاف تادیبی کارروائی شروع کر دی ہے۔محکمہ صحت پنجاب نے تمام ڈاکٹرز، نرسز اور الائیڈ ہیلتھ اسٹاف کی چھٹیوں پر بھی پابندی عائد کر دی ہے۔ایکس پاکستان لیو، EOL، سٹڈی، میٹرنٹی اور عدت کی چھٹیاں لینے والے اس پابندی سے مستثنیٰ ہوں گے۔ڈاکٹرز، نرسز اور الائیڈ ہیلتھ اسٹاف کو فوری طور پر واپس اپنی ڈیوٹی پر آنے کی ہدایت کر دی گئی ہے۔اس حوالے سے مراسلہ بھی جاری کر دیا گیا ہے۔