لاہور میں انسداد پولیو مہم جاری، 22 لاکھ سے زائد بچوں کو قطرے پلائے گئے

لاہور (اُردو پوائنٹ اخبارتازہ ترین - آن لائن۔ 28 اپریل2025ء) ڈپٹی کمشنر لاہور سید موسیٰ رضا اور وزیراعلیٰ پنجاب کی معاون خصوصی برائے پولیو عظمیٰ کردار کی مشترکہ صدارت میں لاہور میں پولیو مہم کے حوالے سے ایک اہم جائزہ اجلاس منعقد ہوا۔ اجلاس میں ایڈیشنل ڈپٹی کمشنر جنرل، تمام اسسٹنٹ کمشنرز، سی او ہیلتھ اور بین الاقوامی مبصرین نے شرکت کی۔

سی او ہیلتھ ڈاکٹر ذوہیب حسن خان نے تفصیلی بریفنگ دیتے ہوئے بتایا کہ لاہور میں انسداد پولیو مہم کے دوران شہر بھر میں 95 فیصد سے زیادہ اہداف حاصل کیے گئے ہیں اور 22 لاکھ سے زائد بچوں کو پولیو کے قطرے پلائے گئے ہیں۔ انہوں نے مزید بتایا کہ پولیو مہم میں رہ جانے والے بچوں کی نشاندہی اور انہیں قطرے پلانے کے لیے خصوصی ٹیمیں تعینات کی گئی ہیں۔

(جاری ہے)

شہر میں متعدد ریلیوں اور احتجاجات کے باوجود ضلعی انتظامیہ نے پولیو مہم کو کامیابی سے جاری رکھا اور 95 فیصد اہداف حاصل کیے۔ احتجاج کے باعث مکمل اہداف کے حصول کے لیے مہم میں 2 روز کا اضافہ کیا گیا ہے۔ ڈپٹی کمشنر لاہور سید موسیٰ رضا نے اس موقع پر کہا کہ "تمام ڈی ڈی ایچ اوز فیلڈ میں سخت مانیٹرنگ یقینی بنائیں۔" انہوں نے مزید ہدایت دی کہ "پولیو مہم میں تمام متعلقہ محکمے مل کر کام کریں۔

" ڈی سی لاہور نے شہریوں سے اپیل کی کہ "پولیو ٹیموں کے ساتھ تعاون کریں، کوئی بچہ قطروں سے محروم نہ رہے۔" انہوں نے کہا کہ "وزیراعلیٰ پنجاب مریم نواز شریف کے ویڑن کے مطابق لاہور سے پولیو کا خاتمہ کرنا ہمارا ہدف ہے۔" ڈپٹی کمشنر سید موسیٰ رضا کی قیادت میں پولیو ٹیمیں پرعزم اور پرجوش ہیں۔" وزیراعلیٰ پنجاب کی معاون خصوصی برائے پولیو عظمیٰ کردار نے کہا کہ "مکمل اہداف کے لیے مہم میں 2 دن کا اضافہ کیا گیا ہے۔

" انہوں نے مزید کہا کہ "پانچ سال سے کم عمر تمام بچوں کو پولیو کے قطرے پلانا یقینی بنائیں۔" انہوں نے انسداد پولیو مہم کی کامیابی پر ضلعی انتظامیہ کی کاوشوں کو سراہا اور کہا کہ متعدد مشکلات کے باوجود 95 فیصد اہداف حاصل کرنا ایک بڑی کامیابی ہے۔ اجلاس میں فیصلہ کیا گیا کہ پولیو مہم میں رہ جانے والے بچوں تک پہنچنے کے لیے خصوصی حکمت عملی بنائی جائے گی اور اگلے دو دنوں میں بقیہ 5 فیصد ہدف بھی حاصل کر لیا جائے گا۔

پولیو ٹیموں کو ہدایت کی گئی کہ وہ دور دراز اور رسائی سے باہر کے علاقوں میں بھی جائیں تاکہ کوئی بچہ قطروں سے محروم نہ رہے۔ ڈپٹی کمشنر نے تمام محکموں کو ہدایت دی کہ وہ اس مہم کو کامیاب بنانے کے لیے اپنی تمام تر صلاحیتیں بروئے کار لائیں تاکہ وزیراعلیٰ پنجاب کے ویژن کے مطابق لاہور کو پولیو سے پاک کیا جا سکے۔