Live Updates

"اے مومنٹ اِن ٹائم" تین پاکستانی فنکاروں کی شاہکار نمائش کا نیشنل آرٹ گیلری میں آغاز ہوگیا

پیر 28 اپریل 2025 21:50

اسلام آباد (اُردو پوائنٹ اخبارتازہ ترین - اے پی پی۔ 28 اپریل2025ء) پاکستان کی فنونِ لطیفہ کی دنیا میں ایک منفرد لمحہ تخلیق ہوا ہے جب ملک کے تین نامور فنکار جمی انجینئر، پروفیسر ڈاکٹر راحت نوید مسعود اور آمنہ اسماعیل پٹوڈی کے فن پاروں کی مشترکہ نمائش "اے مومنٹ اِن ٹائم" کے ذریعہ ایک ساتھ جلوہ گر ہوئے ہیں۔ یہ نمائشی سلسلہ پاکستان نیشنل کونسل آف دی آرٹس (پی این سی اے) اور فار آرٹ سیک کے اشتراک سے نیشنل آرٹ گیلری اسلام آباد میں شروع ہوئی اور 12مئی 2025 تک ہفتہ وار دنوں میں صبح 10 بجے سے شام 4 بجے تک جاری رہے گا۔

"اے مومنٹ اِن ٹائم" صرف ایک نمائش نہیں بلکہ ایک تخلیقی مکالمہ ہے، تین الگ الگ تخیلات کا حسین امتزاج جہاں تاریخ، شناخت اور ذاتی تجربات ایک دلآویز ہم آہنگی میں ڈھل کر ناظرین کے دلوں کو چھوتے ہیں۔

(جاری ہے)

جمی انجینئر جنہوں نے 1976 میں اپنے فنی سفر کا آغاز کیا، اپنے جذباتی اور موضوعاتی طور پر جاندار کام کے لئے مشہور ہیں۔ ان کے فن پارے بالخصوص تقسیم ہند اور علامہ اقبال کے "جاوید نامہ" پر مبنی سیریز، پاکستانی تاریخ اور فلسفے کی گہری بصری ترجمانی کرتے ہیں۔

جمی انجینئر کو حکومتِ پاکستان کی جانب سے ستارہ امتیاز اور حالیہ ہلال امتیاز جیسے اعزازات سے نوازا جا چکا ہے۔ ڈاکٹر راحت نوید مسعود کی خود نگاری پر مبنی سیریز "ذات سے بالا تر " نہ صرف ذاتی کیفیات بلکہ سماجی اور ثقافتی مظاہر کی بھی عکاسی کرتی ہے۔ ان کی تصویریں ذاتی شناخت اور اجتماعی شعور کے درمیان پل کا کام کرتی ہیں، جس سے ناظرین ایک گہری فکری مکالمے میں کھنچے چلے آتے ہیں۔

آمنہ اسماعیل پٹوڈی اپنی فنی بصیرت اور جمالیاتی تجربات کو نہایت باریکی سے سٹل لائف اور روحانیت سے مربوط کرتی ہیں۔ ان کا تخلیقی سفر نہ صرف قومی سطح پر بلکہ بین الاقوامی سطح پر بھی اپنی شناخت قائم کر چکا ہے، جس کی عکاسی ان کی کتاب "47 پینٹنگز " اور متنوع نمائشوں سے ہوتی ہے۔یہ نمائش ناظرین کو دعوت دیتی ہے کہ وہ لمحے بھر کے لئے وقت کو تھام لیں اور تین غیر معمولی فنکاروں کی آنکھ سے اس عہد کے جذبات، خواب اور داستانیں دیکھیں۔