پاکستانی ٹی وی چینلز بھارت میں بند کرنے پر عطا اللہ تارڑ کا ملکی میڈیا اداروں ،صحافیوں سے ٹیلیفونک رابطہ، قومی بیانئے کے دفاع پر خراج تحسین

اسلام آباد (اُردو پوائنٹ اخبارتازہ ترین - این این آئی۔ 28 اپریل2025ء)وفاقی وزیر اطلاعات و نشریات عطا اللہ تارڑ نے بھارت کی جانب سے پاکستانی ٹی وی چینلز اور متعدد صحافیوں و اینکر پرسنز کے یوٹیوب چینلز کو بھارت میں بند کرنے کے اقدام پر ملکی میڈیا اداروں، صحافیوں اور اینکر پرسنز سے ٹیلیفونک رابطہ کیا اور قومی بیانیہ کے موثر دفاع اور بھارتی پروپیگنڈے کے خلاف پاکستان کے موقف کو دنیا کے سامنے مدلل انداز میں پیش کرنے پر انہیں خراج تحسین پیش کیا۔

انہوں نے کہا کہ بھارتی حکومت نے اپنی شرمندگی اور خفت چھپانے کے لیے پاکستانی چینلز پر پابندیاں عائد کیں لیکن ان اقدامات سے حقائق دبائے جا سکتے ہیں نہ ہی پاکستان کا موقف دنیا سے چھپایا جا سکتا ہے۔ عطا اللہ تارڑ نے کہا کہ بھارت کا بیانیہ عالمی سطح پر مکمل طور پر ناکام ہو چکا ہے جبکہ پاکستانی میڈیا نے موجودہ صورتحال میں پیشہ ورانہ مہارت، ذمہ داری اور حب الوطنی کا مظاہرہ کرتے ہوئے مثالی کردار ادا کیا۔

(جاری ہے)

انہوں نے کہا کہ پاکستانی میڈیا نے بھارتی پروپیگنڈے کا موثر جواب دیا اور عالمی برادری کے سامنے پاکستان کا موقف واضح انداز میں پیش کیا جس پر وہ خراج تحسین کے مستحق ہیں۔ وفاقی وزیر اطلاعات نے کہا کہ حکومت پاکستان ان میڈیا اداروں اور صحافیوں کی مکمل حمایت جاری رکھے گی جو قومی وقار کو بلند کرنے اور بیانیے کے فروغ میں اپنا کردار ادا کر رہے ہیں۔

انہوں نے کہا کہ حکومت ہر اس آواز کی حوصلہ افزائی کرے گی جو ملک کی سالمیت، وقار اور قومی بیانیے کی ترویج میں معاون ہو۔ عطا اللہ تارڑ نے زور دیا کہ بھارتی حکومت کا پاکستانی ٹی وی چینلز اور یوٹیوب پلیٹ فارمز پر قدغن لگانا صحافت کے عالمی اصولوں کی صریحا خلاف ورزی ہے۔ انہوں نے کہا کہ حکومت پاکستان اس معاملے کو متعلقہ بین الاقوامی فورمز پر بھی اٹھائے گی تاکہ دنیا بھارتی قدغنوں سے آگاہ ہو سکے۔

وفاقی وزیر نے کہا کہ پاکستانی میڈیا نے حالات کی نزاکت کو مدنظر رکھتے ہوئے قومی مفادات کو ترجیح دی اور انتہائی متوازن اور ذمہ دارانہ رپورٹنگ کی مثال قائم کی۔ انہوں نے کہا کہ پاکستانی صحافیوں اور اینکر پرسنز نے پیشہ ورانہ دیانتداری سے اپنی ذمہ داریاں نبھائیں اور ان کی خدمات کو سنہری حروف میں لکھا جائے گا۔