Live Updates

معاشی بحالی کیلئے بیوروکریسی اور بزنس کمیونٹی سمیت ہم سب کو اپنی سوچ اور طرز عمل کو یکسر بدلنا ہوگا، ریحان نسیم بھراڑہ

منگل 29 اپریل 2025 13:22

مکوآنہ (اُردو پوائنٹ اخبارتازہ ترین - این این آئی۔ 29 اپریل2025ء)معاشی بحالی کیلئے بیوروکریسی اور بزنس کمیونٹی سمیت ہم سب کو اپنی سوچ اور طرز عمل کو یکسر بدلنا ہوگا۔ یہ بات فیصل آباد چیمبر آف کامرس اینڈانڈسٹری کے صدر ریحان نسیم بھراڑہ نے نیشنل انسٹیٹیوٹ آف پبلک ایڈمنسٹریشن پشاور میں زیر تربیت 37ویں سینئر مینجمنٹ کورس کے شرکا سے خطاب کرتے ہوئے کہی۔

انہوں نے فیصل آباد اور فیصل آباد چیمبر آف کامرس اینڈانڈسٹری کا تعارف پیش کرنے کے علاوہ ملک کی مجموعی معاشی صورتحال پر روشنی ڈالی اور شرکا کے سوالوں کے جوابات بھی دیئے۔ انہوں نے کہا کہ ٹیکسٹائل فیصل آباد کی شناخت ہے مگر گزشتہ 2دہائیوں سے اس شہر کا صنعتی منظر نامہ تیزی سے تبدیل ہوا ہے اورآج یہاں کاروں کی اسمبلنگ کے علاوہ فارماسوٹیکل، فوڈ اور کنفکشنری، ڈائپر اور ٹائلز کی بھی برآمد ہو رہی ہے۔

(جاری ہے)

انہوں نے ’’اڑان پاکستان‘‘ پروگرام کے تحت برآمدات کو 60۔ارب ڈالر تک بڑھانے کی حمایت کی اور کہا کہ ہم پاکستان کی برآمدات کو 100۔ارب ڈالر تک لے جا سکتے ہیں مگر اس مقصد کیلئے ہمیں دیگر متعلقہ شراکت داروں سے مشاورت کرنا ہوگی۔ انہوں نے سوالوں کے جواب دیتے ہوئے کہا کہ پائیدار معاشی ترقی کیلئے پالیسیوں کے تسلسل اور سازگار ماحول مہیا کرنے کے علاوہ آئی ٹی اور ٹیکنالوجی کے فروغ کیلئے بنیادی اقدامات اٹھانے کی ضرورت ہے۔

انہوں نے کہا کہ وزیر خزانہ اور سپیشل انوسٹمنٹ فیسلی ٹیشن کونسل بہت اچھا کام کر رہے ہیں جس سے حالات بتدریج بہتر ہو رہے ہیں۔ کو آرڈی نیٹر کیپٹن (ر) خالد محمود نے مہمان نوازی پر فیصل آباد چیمبر آف کامرس اینڈانڈسٹری کا شکریہ ادا کیا۔ آخر میں صدر ریحان نسیم بھراڑہ نے طارق بختیار کو چیمبر جبکہ طارق بختیار نے صدر ریحان نسیم بھراڑہ کو نیپا پشاور کی شیلڈ پیش کی۔ سینئر مینجمنٹ کورس کے شرکاء کو فیصل آباد چیمبر آف کامرس اینڈانڈسٹری کی گولڈن جوبلی کے حوالے سے خصوصی پن بھی لگائی گئیں۔