Live Updates

سپریم کورٹ کے آئینی بینچ میں زیر سماعت سپر ٹیکس سے متعلق کیس کی سماعت پیر تک ملتوی

منگل 29 اپریل 2025 16:02

اسلام آباد (اُردو پوائنٹ اخبارتازہ ترین - اے پی پی۔ 29 اپریل2025ء) سپریم کورٹ آف پاکستان کے آئینی بنچ نے سپر ٹیکس سے متعلق کیس کی سماعت ایف بی آر کے وکیل کی استدعا پر 5 مئی تک ملتوی کر دی ۔ جسٹس امین الدین خان کی سربراہی میں سپریم کورٹ آف پاکستان کے پانچ رکنی آئینی بینچ نے منگل کو سپر ٹیکس سے متعلق کیس کی سماعت کی۔بنچ میں جسٹس جمال خان مندوخیل ،محمد علی مظہر ،جسٹس سید حسن اظہر رضوی اور جسٹس شاہد حسن بلال بھی شامل تھے۔

(جاری ہے)

دوران سماعت ایف بی ار کے وکیل رضا ربانی کی جانب سے سماعت ملتوی کرنے کی استدعا کی گئی جس پر جسٹس امین الدین خان کی جانب سے ریمارکس دیے گئے کہ ہم کیس کی سماعت کل تک ملتوی کر رہے ہیں۔ایف بی آر کے وکیل رضا ربانی نے موقف اختیار کیا کہ کل کے لیے سماعت ملتوی نہ کریں، میں اس وقت کراچی میں ہوں، سماعت جمعرات تک ملتوی کر دی جائے۔ جسٹس امین الدین خان نے ریمارکس دیئے کہ جمعرات کو یکم مئی کی چھٹی ہے۔

بعدازاں سپر ٹیکس سے متعلق کیس کی سماعت 5مئی بروز پیر تک ملتوی کردی گئی ۔ واضح رہے کہ کیس میں سینیئر وکیل مخدوم علی خان نے انکم ٹیکس آرڈیننس کے سیکشن فور بی کیخلاف دلائل مکمل کر لیے ہیں جبکہ دیگر کمپنیوں اور پرائیویٹ پارٹیز کے وکلاء نے بھی مخدوم علی خان کے د لائل اپنا لیے ہیں۔