Live Updates

بھارتی آبی جارحیت کے خلاف سبی میں ضلعی انتظامیہ کی جانب سے ریلی نکالی گئی

منگل 29 اپریل 2025 19:54

سبی (اُردو پوائنٹ اخبارتازہ ترین - این این آئی۔ 29 اپریل2025ء) بھارتی آبی جارحیت کے خلاف سبی میں ضلعی انتظامیہ کی جانب سے ریلی نکالی گئی ، ضلعی آفیسر ان، سیاسی جماعتوں، سول سوسائٹی کے نمائندوں اور قبائلی عمائدین سمیت مختلف طبقہ فکر کے افراد نے شرکت کی،کمشنر آفس سبی سے ڈپٹی کمشنر سبی جہانزیب شیخ کی قیادت میں بھارتی آبی جارحیت اور سندھ طاس معاہدے کی منسوخی پر احتجاجی ریلی نکالی گئی ریلی کے شرکاء میں اسسٹنٹ کمشنر منصور علی شاہ ،ایجوکیشن آفسرلہڑی لیاقت علی لغاری ،ایجوکیشن آفسر سبی طارق الماس سمیت ضلعی و انتظامی افسران، کسان و زمیندار، سول سوسائٹی، ہندو پنچائیت کے نمائندے، انجمن تاجران، طلباء اور کثیر تعداد میں شہریوں نے شرکت کی ریلی کے شرکاء نے اپنے ہاتھوں میں بینرز اٹھا رکھے تھے جس پرسندھ طاس معاہدہ سے مکرنے اور بھارتی آبی جارحیت کے خلاف مختلف نعرے درج تھے اس موقع پر ریلی کے شرکاء سے مقررین نے خطاب کرتے ہوئے کہا کہ بھارت گھناؤنی سازش کے تحت پاکستان کا پانی بند کرنے کی جو کوشش کر رہاہے پاکستان کا ہر شہری اسکی یہ سازش کسی صورت کامیاب نہیں ہونے دے گا۔

(جاری ہے)

انہوں نے کہا کہ ہماری مسلح افواج اپنے پانی اور سرحدوں کی حفاظت کرنا جانتی ہیں اور ہم بھارت سے اپنے حق کا پانی ضرور لے کر رہیں گے چاہے اس کیلئے ہمیں کچھ بھی کرنا پڑے،اگر بھارت جنگ چاہتا ہے تو پاکستان کا بچہ بچہ،تمام عوام اپنی مسلح افواج کے شانہ بشانہ کھڑے ہیں اور دشمن بھارت کو ہر فورم پر منہ توڑ جواب دیں گے۔