پنجاب کے بیشتر اضلاع میں گرد آلود ہوائوں اورگرج چمک کے ساتھ بارش کا امکان ہے ،پی ڈی ایم اے

منگل 29 اپریل 2025 23:27

لاہور (اُردو پوائنٹ اخبارتازہ ترین - اے پی پی۔ 29 اپریل2025ء) پنجاب ڈیزاسٹر مینجمنٹ اتھارٹی (پی ڈی ایم اے) نے آندھی اور بارشوں کے حوالے سے الرٹ جاری کردیا ۔ ترجمان پی ڈی ایم اے کے مطابق آج 30 اپریل سے 4 مئی تک پنجاب کے بیشتر اضلاع میں گرد آلود ہوائوں اورگرج چمک کے ساتھ بارش کا امکان ہے۔بالائی علاقو ں سمیت منڈی بہاوالدین، گجرات، جہلم، گوجرانوالہ میں تیز ہواوں کے ساتھ بارش جبکہ لاہور، قصور ،سیالکوٹ،نارووال، اوکاڑہ ،فیصل آباد ٹوبہ ٹیک سنگھ جھنگ خوشاب سرگودھا اور میانوالی میں آندھی اوربارشوں کے امکانات ہیں ۔

2 سے 4 اپریل کے درمیان جنوبی پنجاب کے اضلاع ملتان، ڈیرہ غازی خان ،بہاولپور اور بہاولنگر میں بارش طوفان اور جھکڑ چلنے کی پیشگوئی کی گئی ہے ۔ درایں اثنا ڈی جی پی ڈی ایم اے عرفان علی کاٹھیا نے کہا ہے کہ وزیر اعلیٰ پنجاب کی ہدایت کے مطابق ضلعی انتظامیہ کو الرٹ جاری کر دیا ہے۔

(جاری ہے)

سکول ایجوکیشن ،محکمہ صحت ، آبپاشی ، تعمیر و مواصلات، لوکل گورنمنٹ ،لائیو سٹاک ،انفارمیشن ڈیپارٹمنٹ ،واسا ،پنجاب پولیس اور سول ڈیفنس کو بھی موسمی صورتحال کے پیش نظر الرٹ جاری کردیا گیا ۔

عرفان علی کاٹھیا نے کہا کہ شہری آسمانی بجلی سے تحفظ کیلئے محفوظ مقامات پر رہیں،عوام بجلی کی گرج چمک اور طوفانی صورتحال میں کھلے آسمان تلے ہرگز نہ جائیں ۔ایمرجنسی صورتحال میں پی ڈی ایم اے ہیلپ لائن 1129 پر رابطہ کریں۔