پرائم منسٹر یوتھ پروگرام پنجاب سیکرٹریٹ کے وفد کا خواتین یونیورسٹی کا دورہ

ملتان (اُردو پوائنٹ اخبارتازہ ترین - اے پی پی۔ 29 اپریل2025ء) پرائم منسٹر یوتھ پروگرام پنجاب سیکرٹریٹ کے وفد نے خواتین یونیورسٹی کا دورہ کیااور پرووائس چانسلر ڈاکٹر کلثوم پراچہ سے ملاقات کی۔ انہوں نے اپنے پروگرامز کے بارے میں بتایا جس کے بعد ایک خصوصی تقریب جناح ہال میں منعقد ہوئی جس کے مہمان خصوصی فہد شہباز (فوکل پرسن پنجاب) تھے ۔کامران شکور (ممبرنیشنل یوتھ کونسل )بھی موجود تھے۔

تقریب سے خطاب کرتے ہوئے صدر وزیراعظم یوتھ گرین کلب عمائمہ حسن نے کلب کے وژن، مشن اور اہم سرگرمیوں پر روشنی ڈالی ۔ ڈائریکٹر بزنس انکیوبیشن سینٹر ڈاکٹر عاصمہ اکبر نے مختلف اداروں اور صنعتوں کے ساتھ طالبات کی تربیت کے مختلف منصوبوں کے بارے میں بتایا ۔ کامران شکور نے پرائم منسٹر نیشنل یوتھ کونسل کے حوالے سے طالبات کو آگاہ کیا۔

(جاری ہے)

تقریب سے خطاب کرتے ہوئے فہد شہباز نے پرائم منسٹر یوتھ انیشیٹوز کے حوالے سے طالبات کو آگاہ کیا۔

ان کاکہنا تھا کہ پرائم منسٹر یوتھ بزنس اینڈ ایگریکلچر لون سکیم آسان شرائط پر کاروباری قرضے فراہم کر کے نوجوانوں میں انٹرپرینیورشپ کو فروغ دیتا ہے۔نوجوان کاروباریوں کو کاروبار شروع کرنے یا بڑھانے کے لیے مالی مدد فراہم کرتے ہیں ۔سازگار شرح سود اور ادائیگی کی شرائط کے ساتھ قرضہ بھی فراہم کیا جاتا ہے۔ انہوں نے بتایا کہ پرائم منسٹر لیپ ٹاپ اسکیم کے تحت 6 لاکھ لیپ ٹاپ تقسیم کیے جاچکے ہیں اب اس کا دوسرا مرحلہ شروع ہو چکا ہے ۔

انہوں نے مزید کہا کہ دیہی علاقوں میں اقتصادی ترقی کو فروغ دینے کے ساتھ ساتھ زرعی منصوبوں اور کاروباروں کی سپورٹ کی جاتی ہے، درخواستیں ڈیجیٹل یوتھ ہب پلیٹ فارم کے ذریعے جمع کرائی جا سکتی ہیں، ہمارا مقصد نوجوانوں کو کاروباری بننے اور ملازمتیں پیدا کرنے کے لیے بااختیار بنانا ہے۔ انہوں نے مزید کہا کہ اقتصادی ترقی کو فروغ دینا ہے جبکہ نوجوانوں کو اپنے کاروباری خیالات کو آگے بڑھانے کے مواقع فراہم کرناہے تاکےملک ترقی کرسکے۔

 اس موقع پر ڈاکٹر کلثوم پراچہ کا کہنا تھا کہ خواتین یونیورسٹی انٹرپرینوبرز کی حوصلہ افزائی کرتی ہے۔ ہماری طالبات ملکی ترقی میں بھرپور کردار ادا کررہی ہیں ۔وزیرا عظم یوتھ پروگرام طالبات کو آگے بڑھے کےلئے مواقع فراہم کرتا ہے ،ہماری طالبات اس سے مستفید ہورہی ہیں ۔ تقریب کے اختتام پر طالبات نے سوالات و جوابات کا سیشن کیا ۔آخر میں مہمان خصوصی فہد شہباز نے طالبات میں سرٹیفکیٹ تقسیم کیے۔ فہد شہباز نے یوتھ ڈویلپمنٹ سینٹر کا دورہ کیااس موقع پر چیئرپرسنز، اساتذہ اور طالبات بھی موجود تھیں ۔