کاٹی میں ٹریفک قوانین سے متعلق آگاہی کیلئے سیمینار کا انعقاد

کراچی (اُردو پوائنٹ اخبارتازہ ترین - این این آئی۔ 29 اپریل2025ء)کورنگی ایسوسی ایشن آف ٹریڈ اینڈ انڈسٹری (کاٹی) کے زیر اہتمام صنعتی زون میں موٹر سائیکل سواروں اور ملازمین کی ٹرانسپورٹ کے لیے ٹریفک قوانین پر عملدرآمد کے موضوع پر ایک اہم سیمینار کا انعقاد کیا گیا۔سیمینار سے خطاب کرتے ہوئے ایس ایس پی ٹریفک کورنگی سید محمد علی رضا نے کہا کہ صنعتی علاقوں میں ٹریفک قوانین کی پابندی نہ صرف سڑک پر موجود ہر فرد کی جان و مال کے تحفظ کے لیے ضروری ہے بلکہ اس سے مجموعی ٹریفک نظام بھی بہتر ہوتا ہے۔

انہوں نے کہا کہ ہیلمٹ کا استعمال، رفتار کی حد، ٹریفک سگنلز اور لین کی پابندی، گاڑیوں کی دیکھ بھال، درست ڈرائیونگ لائسنس کا حصول، ڈرائیونگ کے دوران موبائل فون کے استعمال پر پابندی جیسے عوامل سڑکوں کو محفوظ بنانے میں کلیدی کردار ادا کرتے ہیں۔

(جاری ہے)

انہوں نے کہا کہ کراچی میں 42 لاکھ موٹر سائیکلیں رجسٹرڈ ہیں، اور چند دنوں سے ٹینکر اور کنٹینرز کے حادثات بہت نمایاں ہیں جس میں بے شمار قیمتی جانیں ضائع ہوئیں ہیں، لیکن ان حادثات میں 100 فیصد غلطی ٹرک ڈرائیورز کی بھی نہیں،کہیں نہ کہیں ٹریفک قوانین کی خلاف ورزی ہوتی ہے جس کے باعث حادثات رونما ہوتے ہیں۔

کورنگی میں گزشتہ 3 ماہ میں جان لیوا حادثات کی تعداد 30 تھی جس میں سے 23 حادثات میں غلطی موٹر سائیکل سواروں کی ہیں جس میں ہیلمٹ نہ پہننا، مقررہ لین میں بائیک نہ چلانا، سائیڈ کے شیشوں میں عقب سے آنے والے ٹریفک کو بغیر دیکھے مڑنے کے واقعات شامل ہیں۔ ایس ایس پی ٹریفک کورنگی نے کہا کہ پولیس کی تحویل میں 434 بڑی گاڑیاں، بسیں شامل ہیں جو انتہائی مخدوش حالت میں ہونے کے باوجود سڑکوں پر چلائی جا رہی تھیں جنہیں پولیس نے بند کیا۔

ایس ایس پی ٹریفک نے صنعتکاروں اور ملازمین پر زور دیا کہ وہ ان اصولوں کی پیروی کو اپنی ذمہ داری سمجھیں اور ادارہ جاتی سطح پر ٹریفک آگاہی کو فروغ دیں تاکہ حادثات کی شرح میں کمی لائی جا سکے۔ انہوں نے کہا کہ کاٹی کے تعاون سے موسم گرما کی مناسبت سے ایسے ہیلمٹ تیار کئے جارہے ہیں جو گرمی کے موسم میں پہننا آسان ہو اور جس سے جان لیوا حادثات سے بچا جاسکتا ہے۔

علی رضا نے مزید کہا کہ کاٹی کے ممبران کی سہولت کیلئے ہفتہ میں 2 مرتبہ لائسنس برانچ میں فاسٹ ٹریک ڈیسک کا انعقاد کیا جارہا ہے جس میں لائسنس اور دیگر مسائل فوری طور پر حل کئے جائیں گے۔ قبل ازیں کاٹی کے صدر جنید نقی نے سیمینار سے خطاب کرتے ہوئے کہا کہ صنعتی علاقوں میں کام کرنے والے ہزاروں ملازمین روزانہ ٹریفک مسائل کا سامنا کرتے ہیں اور معمولی کوتاہیاں بعض اوقات جان لیوا حادثات میں تبدیل ہو جاتی ہیں۔

انہوں نے کہا کہ کاٹی نہ صرف صنعتی ترقی میں اہم کردار ادا کر رہی ہے بلکہ سماجی فلاح اور تحفظ عامہ کے لیے بھی سرگرم ہے۔جنید نقی نے کہا کہ کاٹی اس طرح کی آگاہی مہمات کے ذریعے صنعتی برادری اور ملازمین کو ٹریفک قوانین کی اہمیت سے روشناس کروا رہی ہے، تاکہ نہ صرف صنعتی سرگرمیاں جاری رہیں بلکہ معاشرتی تحفظ بھی یقینی بنایا جا سکے۔ انہوں نے کہا کہ صنعتی علاقوں میں ٹریفک پولیس کی موجودگی اور انفراسٹرکچر کو بہتر بنایا جائے تاکہ قانون پر عمل درآمد مؤثر طور پر ممکن ہو۔ سیمینار میں مختلف صنعتوں کے نمائندوں، ڈی ایس پی ٹریفک کورنگی شبیر احمد، ایس او کورنگی آصف شہزاد سمیت دیگر ٹریفک پولیس افسران اور کاٹی ممبران نے بڑی تعداد میں شرکت کی۔