وزیراعلی پنجاب نے ''اپنی زمین اپنا گھر''ای پورٹل کا افتتاح کردیا، بے گھر افراد کو چھت کی فراہمی محمد نواز شریف کا ویژن ہے،مریم نواز

لاہور (اُردو پوائنٹ اخبارتازہ ترین - اے پی پی۔ 03 مئی2025ء) وزیراعلیٰ پنجاب مریم نواز نے ہفتہ کے روز ''اپنی زمین اپنا گھر''ای پورٹل کا افتتاح کردیا۔وزیراعلی مریم نوازنے ''اپنی چھت،اپنا گھر ''پروگرام کی شاندار کامیابی کے بعدڈیجیٹل بٹن دبا کے ''اپنی زمین، اپنا گھر ''ای پورٹل کا باقاعدہ آغاز کیا۔ترجمان ایوان وزیر اعلیٰ کے مطابق بے گھر افراد کیلئے پنجاب میں ہرروز مزید300گھربننے لگے ، عوام ای پورٹل azag.punjab.gov.pk پر مفت پلاٹ کے لئے اپلائی کر سکیں گے،پنجاب کے 19 اضلاع میں 23 ہائوسنگ سکیموں کے تحت بے گھر شہریوں کو تین مرلے کے دو ہزار پلاٹ مفت دئیے جائیں گے، اپنی زمین اپنا گھر کے تحت قرعہ اندازی میں پلاٹ حاصل کرنے والے خوش نصیب قرض بھی حاصل کرسکیں گے، پہلے فیز میں جہلم،پتوکی، ماموں کانجن، لودھراں اور رینالہ خورد میں مفت پلاٹ دیئے جائیں گے۔

(جاری ہے)

'اپنی زمین اپنا گھر''ای پورٹل کے افتتاح کے موقع پر وزیر اعلی مریم نواز نے کہا کہ اپنی چھت، اپنا گھر پروگرام میرے دل کے بہت قریب ہے، بے گھر افراد کو چھت کی فراہمی قائد محمد نواز شریف کا ویژن ہے ،محمد نوازشریف لوگوں کے گھر کی تکمیل کا سن کر بہت خوش ہوتے ہیں۔ مریم نوازشریف نے کہا کہ چھ ماہ کی قلیل مدت میں تقریبا 34ہزار گھر بن رہے ہیں جن میں سے 2ہزار مکمل بھی ہوچکے ہیں یہ 34ہزار گھر نہیں بلکہ دعائیں ہیں،اپنی چھت، اپنا گھر کے تحت مکان بنانے والے تمام افراد کو مبارکباد پیش کرتی ہوں۔

انہوں نے کہا کہ اپنی چھت، اپنا گھر کیلئے آسان ترین قسط اورتین ماہ کا گریس پریڈ مقرر کیا گیا، قرضوں کی واپسی بھی شروع ہوچکی ہے،پنجاب بھر میں بہت سے لوگوں کے پاس گھر بنانے کے لئے نہ زمین ہے نہ پیسے، لہذاپہلے مرحلے میں 2000لوگوں کو مفت پلاٹ دیئے جائیں گے،جس کیلئے azag.punjab.gov.pk پر اپلائی کیا جا سکتا ہے۔ انہوں نے کہا کہ آج تک جتنی بھی حکومتیں رہیں اپنے دور میں کئی دہائیوں تک 34ہزار گھر بھی نہیں بنا سکے،اپنے گھر سے تحفظ کا احساس ملتا ہے، کہنا آسان ہے مگر عام آدمی کیلئے گھر کا حصول بہت مشکل ہے،اپنی چھت، اپنا گھر پروگرام کے تحت ایک سے 10مرلہ تک پلاٹ مالکان قرض کیلئے اپلائی کر سکتے ہیں۔

قبل ازیں صوبائی وزیر ہائوسنگ بلال یاسین نے بریفنگ دیتے ہوئے وزیر اعلیٰ کوبتایا کہ اپنی چھت اپنا گھر کے تحت 33500 افراد کو گھر بنانے کیلئے 36 ارب قرض جاری کئے،پنجاب بھر کے عوام اپنی چھت اپنا گھر پروگرام پر وزیراعلی مریم نواز کو خراج تحسین پیش کرتے ہیں۔