قومی اسمبلی اجلاس، سینیٹر علامہ ساجد میر اور ملک بھر میں چھوٹے بڑے حادثات میں جاں بحق افراد کے ایصال ثواب کیلئے فاتحہ خوانی

پیر 5 مئی 2025 20:20

اسلام آباد (اُردو پوائنٹ اخبارتازہ ترین - اے پی پی۔ 05 مئی2025ء) ایوان زیریں کے اجلاس میں سینیٹر علامہ ساجد میر اور ملک بھر میں چھوٹے بڑے حادثات میں جاں بحق ہونے والے افراد کے ایصال ثواب کیلئے فاتحہ خوانی کی گئی جبکہ مسیحی رہنما پوپ فرانسس اور ہندو برادری کے حادثہ میں وفات پانے والے افراد کیلئے ایک منٹ کی خاموشی اختیار کی گئی۔

(جاری ہے)

پیر کو ایوان زیریں کے اجلاس میں سینیٹر علامہ ساجد میر، وزیر مملکت ہیلتھ سروسز مختار احمد ملک کے چچا، رکن قومی اسمبلی رضا علی گیلانی کے تایا، سینیٹر سید فیصل سبزواری کی والدہ، سینیٹر پلوشہ یوسفزئی کی والدہ اور سعودی عرب میں پانچ پاکستانیوں کی بس حادثہ میں اموات، بلوچستان اور خیبرپختونخوا میں سکیورٹی فورسز کے نوجوانوں کی شہادت، بندر عباس ایران میں دھماکہ میں50 افراد کی اموات اور ملک بھر میں ہونے والے تمام چھوٹے بڑے حادثات میں جاں بحق ہونے والے افراد کی مغفرت کیلئے فاتحہ خوانی کی گئی۔

جمعیت علماء اسلام (ف) کے سربراہ مولانا فضل الرحمن نے دعا کرائی۔ اسی طرح پوپ فرانسس کے انتقال اور جامشورو میں ہندو برادری کے وفات پانے والے افراد کی یاد میں ایک منٹ کی خاموشی اختیار کی گئی۔